მინდა, საზოგადოებამ იცოდეს, რომ „ნაციონალურმა მოძრაობამ“ და „ევროპულმა საქართველომ“ მხარი არ დაუჭირეს ეროვნულ იდეას - განათლებას და საქართველოს მომავალს, განაცხადა საქართველოს მთავრობის მეთაურმა პარლამენტში, სადაც მას ინტერპელაციის ფორმატში, დეპუტატებმა მოუსმინეს.

„ორი დღის წინ ამ დარბაზში ძალიან მნიშვნელოვან კანონმდებლობას ეყარა კენჭი. ეროვნულ იდეას - განათლებას. მსურს, ჩვენი პოლიტიკური გუნდის წევრებს მადლობა გადავუხადო მხარდაჭერისთვის. ამავე დროს გითხრათ, რომ ეს იყო საკითხი, რომელზეც მქონდა იმედი, რომ შეძლებდით და გამოხვიდოდით ვიწრო პარტიული ინტერესების ჩარჩოდან. ეს ეხება ყველას, როგორც საქართველოს პარლამენტში წარმოდგენილ პოლიტიკურ ძალებს, ასევე პარლამენტს გარეთ.....

მინდა, ყველა მასწავლებელმა, მოსწავლემ, მათმა მშობლებმა, პროფესორებმა, მეცნიერებმა იცოდნენ, რომ ბიუჯეტის მეოთხედის გამოყოფას განათლებისთვის, ქვეყნის მომავლისთვის თქვენ მხარი არ დაუჭირეთ. მინდა გითხრათ, რომ ეს არის ძალიან დიდი შეცდომა. ბატონო რომან, თქვენ, როგორც „ნაციონალური მოძრაობის“ ფრაქციის ხელმძღვანელი იყავით ერთადერთი, რომელიც წახვედით წინააღმდეგ. თქვენ გაქვთ მეორე შანსი, რომ მეორე და მესამე მოსმენაზე მიიღოთ ღირსეული გადაწყვეტილება და მხარი დაუჭიროთ საქართველოს მომავალს. იმ მომავალს, რომელიც საშუალებას მოგვცემ დავძლიოთ ყველაფერი, რაზეც დღეს ჩვენ ვისაუბრეთ. ყველას მოვუწოდებ, დადგეს ვიწრო პოლიტიკური ინტერესების ჩარჩოების მიღმა. დადგეს იქ, სადაც ჩვენი ეროვნული ინტერესებია. მხარი დავუჭიროთ ეროვნულ იდეას, განათლებას, საქართველოს მომავალს და ერთიან წელში გამართულ საქართველოს“, განაცხადა პრემიერ მინისტრმა, მამუკა ბახტაძემ.