პარლამენტის თავმჯდომარე ხორავას ქუჩაზე მომხდარი მკვლელობის საქმესთან დაკავშირებით მიხეილ კალანდიას დაკავებას ეხმაურება.

„დღეს დადგინდა, რომ სასამართლო მაღალი სტანდარტით ხელმძღვანელობს და ამ მაღალი სტანდარტის პირობებში მტკიცებულებათა ერთობლიობის საფუძველზე იყო მიღებული გადაწყვეტილება კონკრეტული პირის დაკავების თაობაზე. ყველაფერს კონკრეტული საფუძველი სჭირდება“, განაცხადა ირაკლი კობახიძემ, რომლის თქმითაც, ხორავას ქუჩაზე მომხდარი მკვლელობის შემსწავლელმა დროებითმა საპარლამენტო საგამოძიებო კომისიამ მუშაობის დასრულების შემდეგ სამართალდამცავებს კონკრეტული რეკომენდაციები მისცა.

„ჩვენ სამართალდამცავ ორგანოებს რეკომენდაცია მივეცით, რომ სათანადო გამოძიება ეწარმოებინათ შესაძლო პასუხისმგებლობის თაობაზე. ეს რეკომენდაცია კვლავაც ძალაშია. ასევე პასუხისმგებელი ვართ ზედამხედველობაზე და შეგვიძლია, ინფორმაცია დამატებით მოვიკითხოთ, თუ რა ეტაპზეა ამ საკითხის გამოძიება. ამის საფუძველზე შეიძლება გამოიკვეთოს პასუხისმგებლობა“, აცხადებს ირაკლი კობახიძე.