ამერიკის შეერთებული შტატების სახელმწიფო მდივანმა მაიკ პომპეომ ანაკლიის პორტთან დაკავშირებით საქართველოს პრემიერ მინისტრ მამუკა ბახტაძესთან სახელმწიფო დეპარტამენტში გამართული შეხვედრის შემდეგ ერთობლივ პრესკონფერენციაზე იმედი გამოთქვა, რომ საქართველო პორტის პროექტს დაასრულებს, რაც „დაიცავს მას რუსეთისა და ჩინეთის ეკონომიკური გავლენისგან - ის მოჩვენებითი მეგობრები საქართველოს ინტერესებს არ ითვალისწინებენ“.

„საბოლოოდ, მე გამოვხატე ჩვენი იმედი, რომ საქართველო დაასრულებს პორტის პროექტს. პროექტი გააძლიერებს საქართველოს ურთიერთობას თავისუფალი ეკონომიკის მქონე ქვეყნებთან და დაიცავს მას რუსეთისა და ჩინეთის ეკონომიკური გავლენისგან. ეს მოჩვენებითი მეგობრები საქართველოს ინტერესებს არ ითვალისწინებენ. საქართველოს განვითარება, როგორც თავისუფალი სახელმწიფოს, საბჭოთა კომუნიზმის თითქმის საუკუნოვანი გავლენის შემდეგ, ამტკიცებს, რომ ის სწორ გზაზე დგას. ჩვენ ვამაყობთ, რომ ამ გზაზე თქვენი კარგი პარტნიორები ვართ“, განაცხადა მაიკ პომპეომ და დაამატა:

„ჩვენ უნდა განვაგრძოთ თანამშროლობა, რათა თავიდან ავირიდოთ მიღწევების დაკარგვის რისკი და დავრწმუნდეთ, რომ საქართველოს მომავალი ნამდვილად არის დაკავშირებული დასავლეთთან“. 

(ვიდეო ამ თემაზე იხილეთ 4:16 წუთიდან)