„ქართული ოცნების“ მთავრობის, პირველ რიგში პარლამენტის თავმჯდომარის, ირაკლი კობახიძის და შინაგან საქმეთა მინისტრის, გიორგი გახარიას იმპიჩმენტის საკითხის დაყენებას აპირებს საპარლამენტო სხდომაზე „ევროპული საქართველოს“ ლიდერი დავით ბაქრაძე, რომელმაც ახლახან „რუსთავი 2“-ის პირდაპირ ეთერში პარლამენტის შენობის წინ მიმდინარე ხალხმრავალი აქციიდან ჩართვისას განაცხადა, რომ ეს პროცესი იქნება „ქართული ოცნების“ დეპუტატების ლუსტრაცია.

„ეს პროცესი იქნება პირდაპირი ტესტი რამდენად გულწრფელი იყვნენ ის ადამიანები, რომლებიც დღეს ბოდიშებს იხდიდნენ. კობახიძის გადადგომის მხარის არდაჭერით, გახარიას გადადგომის მხარის არდაჭერით, ეს ადამიანები პირდაპირ ხდებიან თანამონაწილენი იმ სამარცხვინო პროცესის რაც დღეს ვიხილეთ საქართველოს პარლამენტში. რომელი პარლამენტის წევრიც არ დაეთანხმება ჩვენს მოთხოვნებს, ის პარლამენტის წევრი იქნება თანამონაწილე დღევანდელი სირცხვილის და ის პარლამენტის წევრი იქნება თანამონაწილე იმ შეურაცხყოფის, რომელიც დღეს მიაყენეს ქართველ ხალხს, რომელიც მიაყენს თითოეულ დევნილს, რომელიც გავრილოვებმა გამოყარეს საკუთარი სახლებიდან და თითოეულ დაღუპულ ჩვენს გმირს, რომელიც გავრილოვებმა დაგვიხოცეს, ამიტომ, თითოეულ უმრავლესობის წევრს კარგად მოვუწოდებ: ვიცი, რომ გეშინიათ ივანიშვილის. დამერწმუნეთ, ათასჯერ უფრო საშიშია ქართველი ხალხის სამსჯავრო და ეს საკითხი იქნება ის საკითხი, რომელიც თქვნ გაგიყვანთ ქართველი ხალხის სამსჯავროზე. ან თქვენ დადგებით ხალხის გვერდზე და ერთად, საქმით გამოვაჩენთ, რომ ასეთი შეურაცხყოფა და ასეთი უბედურება საქართველოში აღარ მოხდება ან გადაეფარებით კობახიძეს, გადაეფარებით გახარიას, გადაეფარებით ივანიშვილს და მაშინ ვერავინ ვერ დაგიცავთ ქართველი ხალხის სამართლიანი პასუხისმგებლობისგან როგორც მინიმუმ და აი ეს პროცესი იქნება იმპიჩმენტი და ყველას დაერქმევა თავისი სახელი და ყველა დადგება თავის ადგილას და იმედი მაქვს, რომ ჩვენ მათ შორის უმრავლესობის წევრებიდან ხელმოწერებს შევაგროვებთ“, განაცხადა დავით ბაქრაძემ.