„გუშინ იყო ძალიან მძიმე დღე თბილისისთვის და ქვეყნისთვის. გუშინ პოლიტიკოსებმა შეძლეს სამართლიანი პროტესტი გადაეზარდათ ძალადობაში“, განაცხადა შინაგან საქმეთა მინისტრმა გიორგი გახარიამ პარლამენტის შენობასთან მიმდინარე მოვლენების შეფასებისას და დასძინა, რომ იქ, სადაც იყო პოლიციის მიერ კონკრეტული ფაქტები უფლებამოსილების გადამეტების, დეტალურად იქნება შესწავლილი, მაგრამ, მისი თქმით, 225-ე მუხლით უკვე აღიძრა საქმე, რომელიც ნიშნავს ჯგუფური ძალადობის ორგანიზებას და ყველა დამნაშავე პირი უმკაცრესად იქნება დასჯილი უახლოეს პერიოდში.  

მისი თქმით, სიტუაცია დაიძაბა იმ დონეზე, რომ პოლიცია იძულებული გახდა გამოეყენებინა სპეციალური საშუალებები და სანამ ადამიანების სიცოცხლეს არ დაემუქრა საფრთხე, პოლიციელები ადგილიდან არ განძრეულან და იცავდნენ თავიანთ თავს.

„გუშინ იყო ძალიან მძიმე დღე ქალაქისთვის, თბილისისთვის და ქვეყნისთვის. გუშინ მოხდა უაღრესად სამწუხარო ფაქტი. გუშინ პოლიტიკოსებმა და პოლიტიკურმა პარტიებმა შეძლეს ჩვენი მოქალაქეების სამართლიანი და გულწრფელი პროტესტი გადაეზარდათ ძალადობაში - ძალადობაში, რომელიც იყო მიმართული პოლიციის და ინსტიტუტების წინააღმდეგ - ძალადობაში, რომელმაც საბოლოოდ მიიღო პარლამენტის შტურმის სახე. ეს არის უმძიმესი რამ, რაც ამ ქვეყანაში უკვე ათწლეულებია არ მომხდარა. ახლა რაც შეეხება იმას, თუ რა მოხდა. მოხდა ჯგუფური თავდასხმები პოლიციაზე, მოხდა ჯგუფური თავდასხმები პარლამენტის შენობაზე, იქ შეღწევის მიზნით და სამწუხაროდ, სიტუაცია დაიძაბა იმ დონეზე, რომ პოლიციამ მიუხედავად იმისა, რომ მაქსიმალურად გამოიყენა თმენის ვალდებულება და ჩვენმა მოქალაქეებმა ეს ნახეს ეკრანებზე, იძულებული გახდა გამოეყენებინა სპეციალური საშუალებები, არალეტალური, რა თქმა უნდა. ჩვენ ვამზადებთ ყველაფერს და ყველასთვის გავხდით საჯაროს როგორ ვითარდებოდა წუთების, წამების მიხედვით რუსთაველზე მოვლენები. უდიდესი აღშფოთება გამოიწვია ჩემში იმან, რომ ადამიანებმა, კიდევ ერთხელ ხაზგასმით მინდა ვთქვა, პოლიტიკოსებმა, რომლებმაც დააპროვოცირეს ჩვენი რიგითი მოქალაქეები, შემდგომ მოედნიდან გაქრნენ - პოლიტიკოსებმა და პარტიის წარმომადგენლებმა შეძლეს, რომ პოლიცია და მოქალაქეები, კიდევ ერთხელ ხაზგასმით ვამბობ, მოქალაქეები, რომლებიც გამოთქვამდნენ გულწრფელ, ალალ პროტესტს, დაეპირისპირებინათ ერთმანეთთან. არც ერთი მათგანი 10 საათის შემდეგ იქ არ ყოფილა. ყველა უბრალოდ გაიქცა იქიდან და შეატოვეს ახალგაზრდები, თავიანთი პროვოკაციების შემდგომ, ერთმანეთს.

„ეს იყო რთული აქცია, რთული პროცესი. კიდევ ერთხელ ვამბობ, პოლიციამ ბოლომდე, მაქსიმალურად გამოიყენა თმენის ვალდებულება. სანამ ადამიანების სიცოცხლეს არ დაემუქრა საფრთხე, პოლიციელები საერთოდ არ განძრეულან, იდგნენ და იცავდნენ თავს. იქ, სადაც იყო კონკრეტული ფაქტი გადამეტების, რა თქმა უნდა ჩვენ დეტალურად ამას შევისწავლით, მაგრამ, რაც მთავარია, პოლიციამ 225-ე მუხლით უკვე აღძრა ძიება, რომელიც ნიშნავს ჯგუფური ძალადობის ორგანიზებას. ჩვენ დეტალურად შევისწავლით ყველაფერს. ყველა ის ადამიანი, რომელიც მოუწოდებდა და მოახერხა და ორგანიზება გაუწია მშვიდობიანი აქციის ძალადობრივ აქციაში გარდაქმნას და შტურმში პარლამენტის და პოლიციელების წინააღმდეგ, უმკაცრესად იქნება დასჯილი უახლოეს პერიოდში“, განაცხადა გიორგი გახარიამ.