„აუცილებელია დაისვას იმ პირთა სამართლებრივი პასუხისმგებლობის საკითხი, ვინც ყველა შესაძლო ხერხის გამოყენებით ქვეყანა ასეთი საფრთხის წინაშე დააყენა“, განაცხადა საქართველოს პრეზიდენტმა სალომე ზურაბიშვილმა რამდენიმე წუთის წინ გამართულ ბრიფინგზე პარლამენტის შენობასთან განვითარებული მოვლენების შეფასებისას.

„არ არის გამორიცხული, რომ ამ მოვლენების განვითარებაში გარკვეული პროვოკაციების ნიშნები იყოს, მაგრამ ეს ვერ იქნება პასუხიმგებლობის შემცირების მიზეზი. იმედი მაქვს, რომ ხელისუფლება ამ ტრაგედიას სწორად შეფასებს და ყველაფერს პასუხი გაეცემა.

მეორე მხრივ, აუცილებელია დაისვას იმ პირთა სამართლებრივი პასუხისმგებლობის საკითხი, ვინც ყველა შესაძლო ხერხის გამოყენებით ქვეყანა ასეთი საფრთხის წინაშე დააყენა“, განაცხადა პრეზიდენტმა და დასძინა, რომ „ყველა, ვინც გუშინ ქუჩაში იდგა, პოლიციელი თუ რიგითი მოქალაქე, ქუჩაში იდგა ქვეყნისთვის“.

სალომე ზურაბიშვილმა თქვა, რომ სამწუხაროდ, პროტესტის ფორმა გასცდა კონსტიტუციურ ჩარჩოებს და პოლიციელები იძულებულნი გახდნენ მიემართათ წესრიგის დამყარებისთვის.

მან „უდიდესი თანაგრძნობა“ გამოუცხადა „ყველა იმ ოჯახს, რომელსაც შეეხო ეს ტრაგედია“.