„კრემლმა, თავად პუტინმა, გავრილოვმა, კარასინმა გააჟღერა ეს გზავნილი, რომ მშვიდობიანი მომიტინგეები, პროტესტანტები, ადამიანები, ვინც გააძევეს აქედან სერგეი გავრილოვი, ისინი უნდა დასჯილიყვნენ. ამიტომ ეს აგრესია, ეს რეპრესიები არის კრემლის დავალება გახარიასადმი“, - განაცხადა „ერთიანი ნაციონალური მოძრაობის“ წევრმა, დეპუტატმა თინა ბოკუჩავამ ცოტა ხნის წინ გაერთიანებული ოპოზიცია „ძალა ერთობაშია“-ს ოფისში გამართულ ბრიფინგზე.

„მანამ, სანამ ხელისუფლება შეასრულებს ჩვენს მოთხოვნას, რომ დაუყოვნებლივ მოხდეს ყველა პოლიტიკური პატიმრის გათავისუფლება, ჩვენ ასევე გვინდა მივმართოთ დაკავებულების ოჯახების წევრებს და ახლობლებს, რომ მათ შეუძლიათ მოგვმართონ აქ, გაერთიანებული ოპოზიციის ოფისში, ჭავჭავაძის 49 ნომერში, რომ მათ გავუწიოთ იურიდიული დახმარება და დროულად გამოვიყვანოთ ეს ადამიანები იმიტომ, რომ რაც დღეს ხდება, რეალურად არის კრემლის დავალების შესრულება. სწორედ კრემლმა, თავად პუტინმა, გავრილოვმა, კარასინმა გააჟღერა ეს გზავნილი, რომ მშვიდობიანი მომიტინგეები, პროტესტანტები, ადამიანები, ვინც გააძევა აქედან სერგეი გავრილოვი, ისინი უნდა დასჯილიყვნენ. ამიტომ ეს აგრესია, ეს რეპრესიები არის კრემლის დავალება გახარიასადმი და დროა მან დაივიწყოს საკუთარი ყოფილი სამშობლო, რომელსაც, როგორც ჩანს ახლაც თავის ნომერ პირველ სამშობლოდ მიიჩნევს და არ აღასრულოს პუტინის დავალებები, ნაცვლად ამისა, შეისმინოს ხალხის მოთხოვნები, მათ შორის ის, რაც გაჟღერდა გუშინდელ მრავალრიცხოვან აქციაზე და გაათავისუფლოს მხოლოდ და მხოლოდ პოლიტიკური ნიშნით დაკავებული ადამიანები, რომელთა წინააღმდეგაც არანაირი მტკიცებულება არ არსებობს. ამ ადამიანების დაკავება ხდება პოლიციელების ცრუ ჩვენებების საფუძველზე და გაყალბებული დოკუმენტაციის საფუძველზე“, განაცხადა თინა ბოკუჩავამ.

გიორგი ვაშაძის თქმით კი, „300-ამდე ადამიანი ამ დრომდე არის დაკავებული, აბსოლუტურად უკანონოდ, ყოველგვარი მტკიცებულებების გარეშე, ყოველგვარი გარემოებების გარეშე, ერთმანეთისგან გადაკოპირებული სასამართლო გადაწყვეტილებებით.

„არიან მოსამართლეები, ვინც თითქოს რამდენიმე საათში განიხილა 30 დამოუკიდებელი საქმე და პატიმრობა მიუსაჯა ამ ადამიანებს. ყველა ეს ადამიანი არის პოლიტიკური პატიმარი“, განაცხადა ვაშაძემ და დაამატა, რომ ოპოზიცია დღეს საღამოს პარლამენტის შენობასთან ისევ შეიკრიბება და კიდევ ერთხელ მოითხოვს გიორგი გახარიას შინაგან საქმეთა მინისტრის პოსტიდან გადადგომას.