თბილისის მერი, პარტია „ქართული ოცნება - დემოკრატიული საქართველოს“ გენერალური მდივანი კახა კალაძე ბოლო დღეებში განვითარებულ მოვლენებს ეხმაურება და გავრცელებულ ვიდეოში ამბობს, რომ 20 ივნისს ღამით, პარლამენტის შენობასთან მომხდარზე „სრული პასუხისმგებლობა იმ დესტრუქციულ ძალებს და პოლიტიკოსებს ეკისრებათ, ვინც პირდაპირ მოუწოდებდა იქ მყოფ ახალგაზრდა გოგო-ბიჭებს შტურმისკენ, პარლამენტის აღებისკენ“ და ამას კალაძის თქმით, „აუცილებლად მოყვება სამართლებრივი რეაგირება“.

„არავისთვის არ იყო მისაღები იმ ადამიანების ხილვა პარლამენტში, ვისგანაც ჩვენი ქვეყნის ტერიტორიების 20% არის ოკუპირებული და ადამიანებს ჰქონდათ ძალიან სწორი გამოხატულება და პროტესტი ამ კონკრეტულ ფაქტთან დაკავშირებით, თუმცა როგორ განვითარდა მოვლენები. დესტრუქციულმა ძალებმა და დესტრუქციულმა კონკრეტულმა პოლიტიკოსებმა იმოქმედეს ძალიან ცუდად. ამას არანაირი გამართლება არ აქვს და საღამოს განვითარებული მოვლენები, ეს არის სრული პასუხისმგებლობა იმ დესტრუქციული პოლიტიკოსების, ვინც პირდაპირ მოუწოდებდა - და ეს ჩვენ ვიხილეთ, საზოგადოებამ ნახა ეს ყველაფერი, გავრცელდა ამის ვიდეოკადრები - ვინც მოუწოდებდა იქ მყოფ ახალგაზრდა გოგო-ბიჭებს შტურმისკენ, პარლამენტის აღებისკენ. ეს იყო ძალიან მძიმე და რა თქმა უნდა, ამას მოყვება სამართლებრივი რეაგირება ჩვენი მხრიდან. ეს ასე არ დარჩება, დაუშვებელია“, აცხადებს კალაძე და წუხილს გამოთქვამს იმის გამო, რომ აქციაზე მყოფების ნაწილმა ფიზიკური დაზიანებები მიიღეს.

კალაძე მზადყოფნას გამოთქვამს თავისი მოკრძალებული წვლილი შეიტანოს ამ ადამიანების გამოჯანმრთელებაში.

კალაძე ასევე ამბობს, რომ პოლიციის მხრიდან ძალის გადაჭარბების ფაქტებიც არ დარჩება რეაგირების გარეშე.