ბიძინა ივანიშვილის შუშის სასახლეში სპეცდანიშნულების რაზმები შეიყვანეს, იტყობინება ამ წუთებში „რუსთავი 2“.

როგორც „რუსთავი 2“ იუწყება, სპეცდანიშნულების რაზმის წევრები ჩაფხუტებით და ფარებით შეიყვანეს ივანიშვილის სასახლის შიდა ტერიტორიაზე, სადაც ასევე განსაკუთრებულ დავალებათა დეპარტამენტის ჯგუფები განლაგდნენ, მათ შორის შეყვანილია 3 სპეცავტომობილი, რომელიც სიგნალის ჩასახშობად გამოიყენება, სავარაუდოდ, იმისთვის, რომ მიმდებარე ტერიტორიაზე მობილური და ინტერნეტკავშირი შეიზღუდოს.

„გიდასტურებთ, რომ პოლიციაა. ჩვენ მზადყოფნაში ვართ ყოველთვის, სადაც დაირღვევა და იქნება ამის მცდელობა, შევეცდებით, რომ დავარეგულიროთ სიტუაცია. იქ, სადაც ამის საფრთხე იქნება, იქ დავიცავთ საზოგადოებრივ წესრიგს. არ აქვს მნიშვნელობა, ეს სად იქნება“, უთხრა ერთ-ერთმა სამართალდამცველმა სამაუწყებლო კომპანიას.

პარლამენტის შენობის წინ კი, უკვე მე-4 დღეა საპროტესტო აქცია გრძელდება, რომლის მთავარი მოთხოვნა შინაგან საქმეთა მინისტრის პოსტიდან გიორგი გახარიას გადადგომა, აქციაზე დაპატიმრებულთა გათავისუფლება და ვადამდელი საპარლამენტო არჩევნების პროპორციული სისტემით ჩატარებაა.

საპროტესტო აქციაზე შაბათს ითქვა, რომ თუკი ხელისუფლება მათ მოთხოვნებს არ დააკმაყოფილებს, შესაძლოა პროტესტის ტალღამ ბიძინა ივანიშვილის შუშის სასახლესთან გადაინაცვლოს.