პარლამენტში დაპირისპირება მოხდა. პლენარული სხდომა საკანონმდებლო ორგანოში ხმაურითა და უმრავლესობისა და ოპოზიციის წარმომადგენლების ურთიერთსაწინააღმდეგო განცხადებებით დაიწყო.

მას შემდეგ, რაც ოპოზიციამ უარი მიიღო დღის წესრიგში ,,ევროპული საქართველოს" რეზოლუციის პროექტის განხილვაზე, რომელსაც მხარს უჭერდა ასევე ,,ნაციონალური მოძრაობა" და რომლის მიხედვითაც, შინაგან საქმეთა მინისტრის, გიორგი გახარიას თანამდებობრივი პასუხისმგებლობის საკითხი უნდა დამდგარიყო, ოპოზიციის წარმომადგენლებმა სხდომათა დარბაზი პროტესტის ნიშნად დატოვეს.

ვიდრე დეპუტატები სხდომათა დარბაზს დატოვებდნენ, ვითარება უკიდურესად დაძაბული იყო. დაპირისპირება ფრაქცია ,,ქართული ოცნების" თავმჯდომარის, მამუკა მდინარაძის განცხადებას მოჰყვა.

მდინარაძემ ოპოზიცია 20 ივნისის ღამეს განვითარებული მოვლენების პროვოცირებაში დაადანაშაულა და განაცხადა, რომ ახლა ისინი დესტრუქციულ ქმდებებს საკანონმდებლო ორგანოში განაგრძობენ.

„პასუხისმგებლობა აიღეთ იმაზე რაც გააკეთეთ, რასაც აკეთებთ და რასაც მოჰყვა ის საშინელება რაც ხდება ქვეყანაში. ხმას დაუწიეთ, არ მოგწონთ ხო ეს ამბავი? რაც გააკეთეთ, როგორ ისარგებლეთ ადამიანების გულწრფელი ემოციით, როგორ ისარგებლეთ, როგორ გინდათ დესტრუქცია და გადატრიალებები ამ ქვეყანაში. გინდათ გადატრიალება ამ ქვეყანაში, ნიკა მელია, დაჯექი, შენ ხარ მთავარი უბედურება ამ ქვეყნის მიხეილ სააკაშვილთან ერთად", მიმართა მდინარაძემ პოლიტიკურ ოპონენტებს.

ამის შემდეგ, დეპუტატები ერთმანეთს ფიზიკურად დაუპირისპირდნენ. პარლამენტის თავმჯდომარის მოვალეობის შემსრულებელმა, თამარ ჩუგოშვილმა ათწუთიანი ტექნიკური შესვენება გამოაცხადა.