„არავითარი გახარია, ბიძინა ივანიშვილმა უნდა დატოვოს ეს ქვეყანა. სანამ ეს კაცი ამ ქვეყანაში იქნება, გახარიების ცვენა იქნება, არაფერი არ შეიცვლება. პრობლემა ამ ქვეყანაში არის ბიძინა ივანიშვილი. ბიძინა ივანიშვილი იქცა დესტაბილიზაციის ფაქტორად საქართველოში. ის არის სახიფათო ქვეყნის უსაფრთხოებისთვის, მით უმეტეს თუ გავითვალისწინებთ მის ფსიქიკურ მდგომარეობას და მის ფსიქიკურ აშლილობას“, - განაცხადა „გამარჯვებული საქართველოს“ ერთ-ერთმა დამფუძნებელმა გუბაზ სანიკიძემ „რუსთავი 2“-ის გადაცემა „არჩევანში“.

მისი თქმით, მსოფლიოში ოლიგარქატის წინააღმდეგ ბრძოლა წარმატებით მიდის და ამის შეჩერება შეუძლებელია.

„ეს დაიწყეს სომხებმა, გაგრძელდა უკრაინაში, მოლდოვაში, ჩეხეთში, ინგუშეთში, სტამბოლის არჩევნებზე. არაჩვეულებრივი პროცესი მიდის და ისტორიის ბორბლის შეჩერება ბიძინა ივანიშვილს კი არა, ჩინგიზ ხანს და მოგვიანებით ნაპოლეონ ბონაპარატეს არ შეეძლო. ეს რა თქმა უნდა ბიძინამ არ იცის, ძალიან მწირი გონების ადამიანია, მწირი ხედვა აქვს და ახლა რასაც ხედავს, ის ჰგონია სამყარო“, განაცხადა სანიკიძემ.

მისი შეფასებით, ბიძინა ივანიშვილს ცუდად აქვს საქმე და მხოლოდ ორი პერსპექტივა გააჩნია - „ერთი, პოლონიუმის მირთმევა რუსეთიდან და მეორე დასავლეთში მისი ანგარიშების გაყინვა“.

„მას დროის მოგება და ორი რამის მიღწევა უნდა. ერთი, მას უნდა, რომ რუსეთთან გაიმართლოს თავი და ზუსტად, ნიკა მელიას მსხვერპლშეწირვა, ეს არის დასაწყისი... ბიძინას ცუდად აქვს საქმე. მას აქვს ორი არჩევანი, სხვა არჩევანი აღარ აქვს უკვე, უფრო სწორად ორი პერსპექტივა - ერთი, პოლონიუმის მირთმევა რუსეთიდან და მეორე დასავლეთში მისი ანგარიშების გაყინვა. როგორც ჩანს, სული მაინც ტკბილია და არჩია, რომ პოლონიუმი აიცილოს თავიდან. ამიტომ ის ყველაფერს იზამს ახლა, რომ მსხვერპლი გადაუგდოს რუსებს. პირველი, როგორც ჩანს, არის ნიკა მელია იმიტომ, რომ „ნაციონალური მოძრაობა“ მაინც მთავარი სამიზნე არის „ოცნების“ და რუსეთის, ამ შემთხვევაში“, აღნიშნა გუბაზ სანიკიძემ.

მან იმ მიზეზზეც ისაუბრა, თუ რატომ არ უშვებს ბიძინა ივანიშვილი თანამდებობიდან შინაგან საქმეთა მინისტრს, გიორგი გახარიას და ასევე გამოთქვა დანამდვილებითი ეჭვი, რომ „ქართული ოცნების“ შეთავაზებულ ინიციატივას 2020 წლის საპარლამენტო არჩევნების პროპორციული სისტემით და ნულპროცენტიანი საარჩევნო ბარიერით ჩატარების თაობაზე, ასრულება არ უწერია.

სანიკიძე ივანიშვილს ქვეყნის დესტაბლიზაციის მთავარ ფაქტორად ასახელებს და მისი ქვეყნიდან წასვლას მოითხოვს.

„გახარია არ არის მარტო მისი აჩემება. გახარია, როგორც ჩანს და როგორც იკვეთება, ეს მაინც რუსებისთვის გარანტიაა ქვეყნის შიგნით. ის არ არის მარტო ბიძინას ახირება და ამიტომ, ოღონდ გახარია დარჩეს და საარჩევნო კანონმდებლობას ასე გვატყუებს. რა თქმა უნდა გადაგვაგდებს ყველა ვარიანტში. გაწელავს დროში, შემოდგომასაც მოანდომებს, გაზაფხულამდე გაიტანს და აღარც შეთანხმებები იქნება, ოპოზიციაში ერთმანეთის დაჭმა წავა იმიტომ, რომ ვიღაცებს იყიდის, ვიღაცებს ვერ იყიდის, ინტრიგანია ჩვეულებრივი და გაზაფხულისთვის გამოიტანს სესიაზე ამ თითქოსდა რეფორმირებულ კანონმდებლობას და ჩააგდებს, მაჟორიტარებს ააყაყანებს. რამდენიმე მაჟორიტარი უკვე გამოჩნდა და თქვა, რომ არ მივცემთ ჩვენ ამას ხმასო. ამიტომ ეს, პროპორციული სისტემა, არ აქვს მნიშვნელობა 0%-იანი იქნება თუ 77%-იანი, არის ბლეფი. დროს იგებს, რომ სული მოითქვას. არავითარ შემთხვევაში არ შეიძლება, რომ ჩვენ ეს დავუშვათ და მე საერთოდ ვფიქრობ, რომ, ეს ჩემი კერძო მოსაზრებაა, მე მგონი მოთხოვნები უნდა შეიცვალოს უკვე. არავითარი გახარია, ბიძინა ივანიშვილმა უნდა დატოვოს ეს ქვეყანა. სანამ ეს კაცი ამ ქვეყანაში იქნება, გახარიების ცვენა იქნება, არაფერი არ შეიცვლება. კობახიძე წავიდა, თალკვაძე მოვიდა, შეიძლება გახარიაზე უარესი მოვიდეს. პრობლემა ამ ქვეყანაში არის ბიძინა ივანიშვილი. ბიძინა ივანიშვილი იქცა დესტაბილიზაციის ფაქტორად საქართველოში. ის არის სახიფათო ქვეყნის უსაფრთხოებისთვის, მით უმეტეს თუ გავითვალისწინებთ მის ფსიქიკურ მდგომარეობას და მის ფსიქიკურ აშლილობას. მარტივი შეკითხვაა. რატომ შეიყვანა სპეცნაზი, ვინ ემუქრებოდა იქ შეჭრით. პირუტყვული შიშები აქვს, ფობიები აქვს, ღამე არ სძინავს, როგორც ჩანს ღამე სპეცნაზელებთან სძინავს უკვე, ფაქტია. რატომ შეიყვანა? ვინმემ მოწოდება გააკეთა, რომ იქით წასულიყო? შეიძლება ვიღაცა სხვისიც ეშინია, არ არის გამორიცხული, ქვეყნის გარედან მაგალითად, ვისი „ზაკაზებიც“ აქვს მიღებული და ვერ ასრულებს, შეიძლება იმისიც ეშინია. ფაქტია ერთი, რომ კვამლი გასდით რუსებს ბიძინასთან დაკავშირებით. ამიტომ ის მსხვერპლშეწირვებს დაიწყებს ჩვენს შორის“, განაცხადა გუბაზ სანიკიძემ.