ან თავდებში დავუდგებით დეპუტატები ნიკა მელიას ან შიდა პატიმრობა იყოს. ის არის ჩვენი კოლეგა და ეს ისტორიაში ჩაიწერება, რომ მე-9 მოწვევის პარლამენტის წევრებმა ის გაწირეს. 55 ათასი საქმე გაქვთ გამოუძიებელი პროკურატურაში... - მიმართა „პატრიოტთა ალიანსის“ დეპუტატმა ემზარ კვიციანმა „ქართული ოცნების“ დეპუტატებს და პროკურატურას.

„ნიკანორ მელიაზე აღძრულია სისხლის სამართლის საქმე, გირაოთია გამოშვებული და არსად არ გაქცეულა. დღესაც აქ მოვიდა, ზის აგერ და გისმენთ. ყველა საფუძველი არსებობს იმის, რომ არ გაიქცევა, რატომ არის მისი პატიმრობაში ყოფნა აუცილებელი, ეგ მაინტერესებს. თუ არის საშუალება, რომ დეპუტატები, ვისაც სურვილი ექნებათ, თავდებში დაუდგეს ნიკა მელიას, აიღონ დეპუტატებმა თავის თავზე, რომ ნიკანორ მელია არ გაიქცევა და არ შეუშლის ხელს გამოძიებას, ან შინაპატიმრობა იყოს. მიუხედავად იმისა, რომ ჩვენ სხვადასხვა პოლიტიკური მიმართულებები გვაქვს, ის არის ჩვენი კოლეგა. ბატონებო, ის არის ჩვენი კოლეგა და ისტორიაში ჩაიწერება, რომ მეცხრე მოწვევის პარლამენტმა კოლეგა გაწირა. რადგანაც მოვიყვანეთ აქ,  დასვით, მაშინ კეთილი ინებეთ და დავიცვათ. არ არის აუცილებელი, მაინცდამაინც პატიმრობა შეეფარდოს“, განაცხადა ემზარ კვიციანიმა. 

კვიციანმა „ერთიანი ნაციონალური მოძრაობის“ პოლიტიკური საბჭოს თავმჯდომარის, დეპუტატ ნიკა მელიასთვის სისხლის სამართლის პასუხისგებაში მიცემის შესახებ პატიმრობის გამოსაყენებლად გენერალური პროკურატურისთვის თანხმობის მიღების წინადადებაზე პარლამენტის პლენარულ სხდომაზე კენჭისყრამდე განაცხადა, რომ სამარცხვინოა ყველაფერი, რაც ამ საქართველოში ხდება და ნიკა მელია „განტევების ვაცია“.

„რა მაინტერესებს. ვინც 20 ივნისს პროვოკაცია მოაწყო, 20 ივნისის პროვოკაცია დაგეგმა, გამოძიებული და დადგენილია უკვე ეს ადამიანები? რატომ პირდაპირ 21-ზე გადავედით და არ არის გამოძიებული ანდა არ ითხოვთ იმ ადამიანების იმუნიტეტის შეჩერებას, რომლებიც 20 რიცხვში აქ შემოვარდნენ, ჩაშალეს ასამბლეა და ამით დიდი ზარალი მიაყენეს ჩვენს ქვეყანას, პოლიტიკურიც და ეკონომიკურიც. რატომ ვიწყებთ შუიდან? ე.ი. ზის აქ ნიკანორ მელია, როგორც განტევების ვაცი. სამარცხვინოა უბრალოდ ყველაფერი, რაც ამ საქართველოში ხდება“, - განაცხადა კვიციანმა.

მისივე თქმით, რუთაველის გამზირზე 21 ივნისის ღამით, აქციაზე საზოგადოებამ ბევრი მოწოდებები მოისმინა, მათ შორის ირაკლი ოქრუაშვილისგან, რომელიც არც კი დაკითხულა.

„ჩვენ 21 ივნისს ვიხილეთ ბევრი ადამიანი, რომლებიც აკეთებდნენ მოწოდებებს. მახსოვს ასეთ ფრაზა, ივანიშვილს ხელიდან უნდა წავგლიჯოთ ხელისუფლება, გახსოვთ ალბათ ყველას, მაგის ავტორი ქვეყნის გამყიდველი ირაკლი ოქრუაშვილია, რომელსაც არ სჭირდება არც შეჩერება იმუნიტეტის და არც ჩამორთმევა. არის დაკითხული ან დაკავებული?!" - განაცხადა ემზარ კვიციანმა სხდომაზე.

„ერთიანი ნაციონალური მოძრაობა“ და „ევროპული საქართველო“ აღნიშნულ პლენარულ სხდომას პროტესტის ნიშნად არ ესწრებიან, თუმცა დარბაზში იმყოფება თავად ნიკა მელია.