ონის მუნიციპალიტეტის მერის პირველმა მოადგილემ დიმიტრი საყვარელიძემ, 2019 წლის 26-27 ივნისს მომხდარი სტიქიური მოვლენის (ძლიერი წვიმა) შედეგად, ონის მუნიციპალიტეტის სოფლებში მიღებული ზარალის შემსწავლელი საგანგებო კომისიის სხდომა გამართა.

შეხვედრაზე განიხილეს 2019 წლის 26-27 ივნისს, ონის მუნიციპალიტეტში სტიქიური მოვლენის დროს ზარალის სავარაუდო ოდენობა.

სოფელ ღებში მდინარე რიონმა დააზიანა არსებული გაბიონი და ნაპირსამაგრი ზოლი, საფრთხე შეუქმნა საავტომობილო გზას და საბაღვენახე ფართობებს.

სოფელ ჟინჭვისში მდინარე გომრულას წყლის დონის მკვეთრი მატების შედეგადაც დაზიანდა და მწყობრიდან გამოვიდა მდინარის გასწვრივ მოწყობილი ნაპირსამაგრი გაბიონები.

კურორტ შოვში მდინარე დღვიორას წყლის დონის მკვეთრი მატების შედეგად დაზიანდა ქუთაისი-ალპანა-მამისონის სახელმწიფო გზის 137-კმ.ზე გზის მონაკვეთი, ასევე გზის გასწვრივ მოწყობილი წყალმომარაგების ქსელი, საიდანაც სასმელი წყალი მიეწოდება კურორტ შოვს და სოფელ გლოლას.

სოფელ ლაგვანთაში მდინარე საკაურამ დააზიანა არსებული ნაპირსამაგრი გაბიონი და საფრთხე შეუქმნა მოსახლეობის საბაღვენახე ადგილებს, მისასვლელ და შიდა საუბნო გზას.

სოფლებში გადამშსა და ჭვებარში ძლიერი წვიმის შედეგად დაზიანდა მისასვლელი და შიდა საუბნო გზა. მწყობრიდან გამოვიდა სახიდე გადასასვლელები და ნაპირსამაგრები. გართულებულია სატრანსპორტო გადაადგილება.

მერის პირველი მოადგილის, დიმიტრი საყვარელიძის განცხადებით, ზარალის საორიენტაციო ღირებულების დადგენის შემდეგ, ადგილობრივი ხელისუფლების მხრიდან მოხდება რეაგირება სტიქიის შედეგად დაზიანებული საგზაო ინფრასტრუქტურის აღსადგენად.

ინფორმაციას ონის მერიის პრესსამსახური ავრცელებს.