ამერიკის შეერთებული შტატების პრეზიდენტი დონალდ ტრამპი ორი კორეის გამყოფ დემილიტარიზებულ ზონაში ჩავიდა და ჩრდილოეთ კორეის ლიდერს, კიმ ჩენ ინს შეხვდა. ტრამპი ამერიკის პირველი მოქმედი პრეზიდენტი გახდა, რომელმაც ფეხი ჩრდილოეთ კორეის მიწაზე დაადგა. 

აღნიშნული შეხვედრის ინიციატორი პრეზიდენტი ტრამპი იყო. ჩრდილოეთ კორეამ მის ამ ინიციატივას „ძალიან საინტერესო“ უწოდა.

სამხრეთ კორეის პრეზიდენტმა მუნ ჟე ინმა განაცხადა, რომ ტრამპი და კიმი „ერთმანეთს ხელს ჩამოართმევენ მშვიდობისთვის“. მოელიან, რომ ლიდერების შეხვედრა ბირთვული პროგრამის ჩიხში შესულ მოლაპარაკებებს ახალ იმპულსს მისცემს.

სეულში გამართულ პრესკონფრენციაზე ტრამპმა განაცხადა, რომ მან და კიმმა „ძალიან კარგი ურთიერთობები განავითარეს“ და იგი მოუთმენლად ელოდება ჩრდილოეთ კორეის ლიდერთან შეხვედრას, რომელიც ბოლო 1 წლის განმავლობაში რიგით მესამეა.

„ეს იქნება ძალიან ხანმოკლე შეხვედრა. შეიძლება ითქვას, რომ ხელის ჩამორთმევა, მაგრამ ეგ ნორმალურია. ხელის ჩამორთმევა ბევრს ნიშნავს“, თქვა ტრამპმა და დასძინა, რომ ეს დაგეგმილი არ ყოფილა, უბრალოდ სამხრეთ კორეაში ჩასვლის შემდეგ გადაწყვიტა, რომ რახან აქ იმყოფებოდა, სალამი ეთქვა კიმისთვის: „სალამი, მე აქ ვარ და მოდი ვნახოთ, შემიძლია თუ არა ვთქვა გამარჯობა“.