„ეს იყო თავდასხმა პირდაპირ და პოლიციას რა უნდა გაეკეთებინა? რომ გაჩერდით ბიჭებო, ახლა უნდა გაგაფრთხილოთო? ეს ასე არ ხდება“, - ამის შესახებ განცხადება თბილისის მერმა დასუფთავების ახალი ტექნიკის პრეზენტაციის შემდეგ მედიასთან გააკეთა.

ჟურნალისტების შეკითხვას, თუ რატომ არ გააფრთხილა მერიამ მომიტინგეები ცრემლსადენი გაზისა და რეზინის ტყვიების გამოყენებაზე, კალაძემ ასე უპასუხა:

„თუ ხდება პოლიციის მხრიდან მოწოდება და მიღებულია გადაწყვეტილება, რომ დაიშალოს კონკრეტული აქცია, თუ მიტინგი, რა თქმა უნდა მიდის წარმომადგენელი და აფრთხილებს რომ ეს ასე ხდება და დაიშალეთ, მაგრამ ჩვენ რადიკალურად განსხვავებული მდგომარეობა გვქონდა, ეს იყო სპონტანური აქცია. ადამიანებმა გამოხატეს თავიანთი გულწრფელი პროტესტი, რასაც დილიდან დაწყებული ჩვენც ვუერთდებოდით, მეც, ჩემს თანაგუნდელებსაც, არავის მოეწონა ის, რომ პირველი, გავრილოვი პარლამენტში აღმოჩნდა და მეორე, დაიკავა სპიკერის სავარძელი. ეს კატეგორიულად მიუღებელი იყო და ჩემი ძალიან ახლო მეგობრებიც აპროტესტებდნენ ამას და იქ იყვნენ, მაგრამ ის, როგორც განვითარდა მოვლენები, ეს იყო თავდასხმა პირდაპირ და პოლიციას რა უნდა გაეკეთებინა? რომ გაჩერდით ბიჭებო, ახლა უნდა გაგაფრთხილოთო? ეს არ ხდება ასე. ძალიან ცუდია ის, რაც მოხდა, თუმცა, ამის მიუხედავად, თქვენ შეგიძლიათ ამოიღოთ განცხადება, ბრიფინგი რომელიც მე ჩავატარე პარტიაში, სადაც გაფრთხილება და მოწოდება იყო, რომ შეგვენარჩუნებინა სიმშვიდე, სიწყნარე, თორემ ამას მოჰყვებოდა შესაბამისი რეაგირება“, - განაცხადა კახა კალაძემ.