საქართველოს საგარეო საქმეთა მინისტრი დავით ზალკალიანი ამერიკის შეერთებული შტატების დამოუკიდებლობის 243 წლის იუბილისადმი მიძღვნილ მიღებას დაესწრო.

მიღებაზე დამსწრე საზოგადოებას საქართველოს პრეზიდენტმა სალომე ზურაბიშვილმა, პრემიერმინისტრმა მამუკა ბახტაძემ, პარლამენტის თავმჯდომარემ არჩილ თალაკვაძემ და აშშ-ის ელჩის მოვალეობის შემსრულებელმა ელიზაბეთ რუდიმ სიტყვით მიმართეს.

"4 ივლისი- ეს არის განსაკუთრებული დღე ყველა ერისთვის, ვისთვისაც მთავარია თავისუფლება, დამოუკიდებლობა და კანონის უზენაესობა, 4 ივლისი ამ ფასეულობების სიმბოლოა." - აღნიშნა საქართველოს პრემიერმინისტრმა.

როგორც აშშ-ის ელჩის მოვალეობის შემსრულებელმა ელისაბედ რუდმა განაცხადა, აშშ განაგრძობს საქართველოს მტკიცე მხარდაჭერას სტრატეგიული პარტნიორობის ფარგლებში და იმ გამოწვევების დაძლევაში, რომლის წინაშეც საქართველო დგას.

"დიდი პატივია აშშ-ს დამოუკიდებლობის 243-ე იუბილეს აღნიშვნა და დიდი პატივია ამ დღესასწაულის აღნიშვნა პრემიერ-მინისტრ მამუკა ბახტაძესთან,პრეზიდენტ სალომე ზურაბიშვილთან და პარლამენტის თავმდომარესთან,არჩილ თალაკვაძესთან და აშშ-სხვა ძვირფას მეგობრებთან და სტუმრებთან ერთად.ჩვენ დღეს ასევე აღვნიშნავთ "აპოლო 11" მისიის 50-ე წლის იუბილეს,როდესაც მთვარეზე პირველად დადგა ადამიანმა ფეხი.ეს თარიღი გვახსენებს ჩვენ შესანიშნავ მოვლენებს,რისი მიღწევაც ერებს შეუძლიათ,როდესაც ისინი არიან თავისუფალი,დემოკრატიული და ისინი ერთად მუშაობენ."-განაცხადა ელისაბედ რუდმა.

საზეიმო მიღება, რომელსაც საქართველოს აღმასრულებელი და საკანომდებლო ხელისუფლების წარმომადგენლები, დიპლომატიური კორპუსის ხელძღვანელები და სხვა მოწვეული სტუმრები დაესწრნენ, საქართველოში აშშ-ის საელჩოში გაიმართა.

აშშ-ში დამოუკიდებლობის დღე 4 ივლისს აღინიშნება და ოფიციალურ დასვენების დღედ არის გამოცხადებული. თარიღი 1776 წლის მოვლენებს უკავშირდება, როდესაც დიდი ბრიტანეთის კოლონიებმა ბრიტანეთის იმპერიისგან დამოუკიდებლობა გამოაცხადეს და დამოუკიდებლობის დეკლარაცია გააფორმეს.