კალიფორნიაში მიწისძვრა განმეორდა, ამჯერად უფრო მძლავრი. შეერთებული შტატების მეტეოროლოგისტების ცნობით სამხრეთ კალიფორნიის უდაბნოს ტერიტორიაზე მომხდარი მიწისძვრის სიმძლავრემ 7.1 მაგნიტუდა შეადგინა. ეპიცენტრი ამჯერადაც ლოს-ანჯელესიდან დაახლოებით 240 კილომეტრით დაცილებული ქალაქის, რიჯკრესტის სიახლოვეს იყო. ამავე რეგიონში ხუთშაბათს 6.4 მაგნიტუდის სიმძლავრის მიწისძვრა მოხდა. სეისმოლოგმა ლუსი ჯონსმა განაცხადა, რომ რყევები შესაძლოა განმეორდეს.

„ეს მიწისძვრის შედეგია. ის განმეორდება. ყოველი მიწისძვრის შემდეგ შემდგომი რყევებია მოსალოდნელი“, განაცხადა ჯონსმა პრესკონფერენციაზე და დაამატა, რომ 10% ალბათობა არსებობს იმისა, რომ მომდევნო კვირას ამავე მასშტაბის ან უფრო დიდი სიმძლავრის მიწისძვრა მოხდეს.

რა დააზიანა მიწისძვრამ?

მიწისძვრამ ხანძრები გამოიწვია. „ჩვენ ვართ ხანძრების მომსწრე, არის ბუნებრივი აირის გაჟონვები, ხალხს დაზიანებები აქვს მიღებული, ზოგიერთი ელექტროენერგიის გარეშეა დარჩენილი“, განაცხადა ქალაქ რიჯკრესტის მერმა პეგი ბრიდენმა „როიტერსთან“ საუბრისას და დაამატა, რომ ყველა ღონეა გამოყენებული მიწისძვრისგან გამოწვეული პრობლემების აღმოსაფხვრელად.

„ზარალი უფრო მეტია, ვიდრე გუშინდელი მიწისძვრის დროს იყო“, განაცხადა სან ბერნარდინოს ოლქის სახანძრო დეპარტამენტმა. მეხანძრეები ცეცხლის ქრობისა და გაზის გაჟონვის აღმოფხვრის პროცესში არიან ჩართული. ოფიციოზის განცხადებით, ჯერჯერობით უცნობია, თუ რამდენმა ადამიანმა მიიღო დაზიანება და რა ოდენობის ზარალი განიცადა შტატმა.