საქართველოს პრემიერ მინისტრმა მამუკა ბახტაძემ გადაცემა „პოსტ-სკრიპტუმის“ წამყვანის განცხადების შეფასებისას თქვა, რომ „ეს არის წლების განმავლობაში არსებული აგრესია ქართველი ხალხის მიმართ, რომელიც მოდის „ნაციონალური მოძრაობის“ და მისი ბელადის მხრიდან“.

„შეფასება არის ერთმნიშვნელოვანი და ძალიან მარტივი. ეს არ არის ერთჯერადი შემთხვევა და რა თქმა უნდა, ეს არ იყო ცალკე აღებული რომელიმე ჟურნალისტის ნათქვამი, ეს სრულიად მიუღებელი ფრაზები. ეს არის წლების განმავლობაში არსებული აგრესია ქართველი ხალხის მიმართ, რომელიც მოდის „ნაციონალური მოძრაობის“ და მისი ბელადის მხრიდან. რაც ჩვენ ვიხილეთ გუშინ, ეს იყო სრულიად ამაზრზენი და ამორალური საქციელი და ამავე დროს გამიზნული და უბინძურესი პროვოკაცია, რომლის მიზანი გახლავთ, რომ მოახდინონ საქართველოში დესტაბილიზაცია, მოახდინონ ჩვენი ეროვნული ინტერესების დაზიანება. მე მინდა გითხრათ, რომ ეს არავის არ გამოუვა, მსგავსი სცენარები საქართველოში არ მოხდება და ჩვენ ამას არ დავუშვებთ“, უთხრა ჟურნალისტებს ბახტაძემ.