საქართველოს ყოფილმა პრეზიდენტმა, ოდესის ოლქის ყოფილმა გუბერნატორმა მიხეილ სააკაშვილმა ოდესის სასამართლოს შენობის გარეთ შეხლა-შემოხლის დროს ასაკოვან ქალბატონს ხელი მოსტეხა. ამის შესახებ „რია ნოვოსტი“ პორტალ Odessit.ua-ზე დაყრდნობით იტყობინება.

უკრაინული გამოცემის თანახმად, სააკაშვილი თავის მხარდამჭერებთან ერთად სასამართლოს შენობის პიკეტის ორგანიზებას ახდენდა, სადაც ქალაქის მერის, გენადი ტრუხანოვის მიერ ქარხანა „კრაიანის“ უკანონო შესყიდვის საქმეზე განაჩენი ცხადდებოდა.

აქციის დროს სააკაშვილმა თავის ოპონენტებთან და მერის დაცვის წევრებთან ჩხუბი მოაწყო და ასაკოვან ქალს ხელი ჰკრა, შედეგად, როგორც Odessit.ua ირწმუნება, პენსიონერი დაეცა და ხელი მოიტეხა, რის შემდეგაც იგი საავადმყოფოში გადაიყვანეს.

„რია ნოვოსტის“ ცნობით, სააკაშვილის მონაწილეობით შეხლა-შემოხლის ფაქტზე უკრაინული არხი „24 канал"“ -იც იუწყება, მაგრამ სიუჟეტში დაზარალებულ პენსიონერზე არაფერია ნათქვამი.

თავის მხრივ, ოდესური გამოცემა „Timer“-ი წერს იმის შესახებ, რომ ხანდაზმულმა ქალბატონმა ხელის დაზიანება მიიღო, თუმცა გამოცემა ამ ინციდენტს პირდაპირ სააკაშვილთან არ აკავშირებს.

უკრაინული პორტალის მიერ გავრცელებული ინფორმაცია „ფეისბუქზე“ თავად მიხეილ სააკაშვილმა გააზიარა და განაცხადა: „ეს ქალი სასამართლოდან  გამოიქცა, გაჰყვიროდა პრო-ტრუხანოვურ ლოზუნგებს და მოითხოვდა, როგორც სხვები - ტრუხანოვისაგან ფულით დაქირავებულები - რომ ჩვენ დაგვეტოვებინა ოდესა. იგი ძალიან აგრესიულად იქნევდა ორივე ხელს, რომელიც არ ჩანდა მოტეხილი. აი, ასე პრიმიტიულად მუშაობს ბანდიტური პროპაგანდა“.