„რუსთავი 2”- ში პარტნიორთა კრება მიმდინარეობს. არხის 9 პროცენტიანი წილის მფლობელი, ნიკა გვარამიას თანამდებობიდან გადაყენებას ითხოვს. პარტნიორთა კრებას, ნინო ნიჟარაძის პრეტენზიებს მისი ადვოკატი აცნობს. 

როგორც კომპანიის 9%-იანი წილის მფლობელის, ნინო ნიჟარაძის ადვოკატი აცხადებს, მთავარი არგუმენტი, რის გამოც ისინი ნიკა გვარამიას თანამდებობიდან გადაყენებას ითხოვენ, არხის სარედაქციო პოლიტიკაა.

გიორგი ყავლაშვილი აცხადებს, რომ ბოლო დღეებში, ჟურნალისტ გიორგი გაბუნიას მონოლოგის გამო, არხმა სერიოზული ზიანი მიიღო. ადვოკატის თქმით, ამაზე პასუხისმგებლობა უნდა აიღოს მენეჯერმა და მან თანამდებობა  უნდა დატოვოს.  

„მთავარი არგუმენტი გახლავთ  ის სარედაქციო პოლიტიკა, რასაც უკანასკნელ პერიოდში აქვს ადგილი. საზოგადოებისთვის კარგად არის ცნობილი, იმ გამოსვლის შედეგად, ვგულისხმობ ბატონი გაბუნიას მხრიდან გამოსვლას, გამოსვლის შედეგად განვითარებული, რაც ტელეარხთან დაკავშირებით მოხდა. ჩვენი შეხედულებით და შეფასებით, ეს წარმოადგენს არხის დისკრედიტაციას. მიგვაჩნია, რომ ეს უშუალოდ დირექტორის პასუხისმგებლობის საკითხი უნდა დადგეს ამ შემთხვევაში. ჩვენ მოვითხოვთ, რომ პარტნიორებმა მხარი დაგვიჭირონ, რომ დღევანდელ სხდომაზე იყოს ეს საკითხი განხილული.

ჩვენ მიგვაჩნია, რომ ეს არ არის საკმარისი, ეს არის მენეჯერის გადაწყვეტილება მისი კომპანიის ერთ-ერთი თანამშრომლის მიმართ. ჩვენ მიგვაჩნია, პარტნიორებმა დირექტორის საქმიანობას შეფასება უნდა მისცენ ამ კუთხითაც“ - განაცხადა გიორგი ყავლაშვილმა.

ცოტა ხნის წინ აღნიშნულ საკითხზე კომენტარი გააკეთა ნიკა გვარამიამ.

„აგერ მთლად ვის საკუთრებასაც ვიცავ, ის მიპირებს გადაყენებას, თან სარედაქციო პოლიტიკისთვის. პუტინის გინებისთვის გადაყენების წინააღმდეგი დიდად არ ვიქნები, შვილიშვილებს მოვუყვები - იმათ მაინც ხომ ეცოდინებათ, რომ ურჩხულს ვებრძოდი და მათი სამშობლოს მტერს, და არა კეთილს და ქართული ეკონომიკის გადამრჩენს“, დაწერა გვარამიამ „ფეისბუქზე“.