ამერიკის შეერთებული შტატების რეგულატორებმა Facebook-ის რეკორდული ოდენობის თანხით, 5 მილიარდი აშშ დოლარით დაჯარიმებას დაუჭირეს მხარი, იტყობინება აშშ-ის მედია. ფედერალური სავაჭრო კომისიის მიერ შეთანხმება 3 ხმით 2-ის წინააღმდეგ იქნა მხარდაჭერილი.

ფედერალური სავაჭრო კომისია ბრალდებებს იძიებს იმასთან დაკავშირებით, რომ პოლიტიკურმა საკონსულტაციო ჯგუფმა, „კემბრიჯ ანალიტიკამ“ შეუსაბამოდ მოიპოვა Facebook-ის 87 მილიონამდე მომხმარებლის მონაცემები.

ფედერალურმა სავაჭრო კომისიამ Facebook-ის შესახებ გამოძიება 2018 წლის მარტში დაიწყო - მას შემდეგ, რაც გავრცელდა ინფორმაცია იმის თაობაზე, რომ „კემბრიჯ ანალიტიკამ“ უკანონოდ მოიპოვა Facebook-ის ათეულობით მილიონი მომხმარებლის მონაცემები.

გამოძიება ფოკუსირებული იყო იმაზე, დაარღვია თუ არა Facebook-მა 2011 წლის შეთანხმება, რომლის თანახმადაც კომპანიას მოეთხოვებოდა მკაფიოდ გაეფრთხილებინა მომხმარებლები და მიეღო მათგან თანხმობა მათი მონაცემების გაზიარების შესახებ.

ანონიმურმა წყაროებმა, რომლებიც საქმის შესახებ არიან ინფორმირებული, The Wall Street Journal-ს უთხრეს, რომ ფედერალური სავაჭრო კომისიის მიერ 5 მილიარდი აშშ დოლარით დაჯარიმების წინადადება 3 ხმით 2-ის წინააღმდეგ იქნა მხარდაჭერილი.

ჯარიმის საბოლოო დამტკიცებას ჯერ კიდევ სჭირდება აშშ-ის იუსტიციის დეპარტამენტის სამოქალაქო განყოფილების თანხმობა და უცნობია რა დრო შეიძლება დასჭირდეს ამ პროცესს, განაცხადეს წყაროებმა.

Facebook-მა და ფედერალურმა სავაჭრო კომისიამ კომენტარის გაკეთებაზე უარი განაცხადეს.