საპროცედურო საკითხთა და წესების კომიტეტმა დღევანდელ სხდომაზე საქართველოს პარლამენტის წევრის ზაქარია ქუცნაშვილისათვის პარლამენტის წევრის უფლებამოსილების ვადაზე ადრე შეწყვეტის საკითხი განიხილა და ერთხმად დაუჭირა მხარი.
საკითხი კომიტეტის თავმჯდომარემ გიორგი კახიანმა გამოიტანა და განაცხადა, რომ ქუცნაშვილისათვის პარლამენტის წევრის უფლებამოსილების ვადაზე ადრე შეწყვეტის საფუძველი მისივე განცხადებაა, რომლითაც პარლამენტის თავმჯდომარეს 28 ივნისს მიმართა. როგორც გიორგი კახიანმა აღნიშნა, განცხადების ნამდვილობა დადგენილია და, შესაბამისად, კომიტეტის დასკვნა ამ საკითხზე წარედგინება პარლამენტის პლენარულ სხდომას, რომელიც მიიღებს გადაწყვეტილებას.
კანონმდებლობის მიხედვით, პარლამენტი ზაქარია ქუცნაშვილისათვის პარლამენტის წევრის უფლებამოსილების ვადაზე ადრე შეწყვეტის საკითხს უახლოეს რიგგარეშე სესიაზე პირველივე საკითხად განიხილავს.
კომიტეტის სხდომაზე ასევე განიხილეს არანაკლებ 200000 ამომრჩევლის ინიციატივით საქართველოს კონსტიტუციის გადასინჯვის შესახებ საქართველოს კონსტიტუციური კანონის პროექტის წარდგენის უფლების განხორციელების მიზნით შექმნილი მოქალაქეთა საინიციატივო ჯგუფის მიერ წარმოდგენილი ხელმოწერების ნამდვილობის დადასტურების საკითხი. საინიციატივო ჯგუფში წარმოდგენილი არიან: გიორგი ახვლედიანი, ალექსანდრე ბარამიძე, თინათინ ბოკუჩავა, კონსტანტინე გამსახურდია, პაატა დავითაია, მურმან დუმბაძე, ალექსანდრე ელისაშვილი, გიორგი ვაშაძე, გრიგოლ ვაშაძე, ლევან თარხნიშვილი, მამუკა კაციტაძე, თამარ კორძაია, შოთა მალაშხია, გოჩა მამაცაშვილი, ნიკა მაჭუტაძე, ნიკანორ მელია, თენგიზ ომანიძე, ხათუნა სამნიძე, გიორგი უგულავა, ბაჩუკი ქარდავა, შალვა შავგულიძე, ლევან ჩხეიძე, ზურაბ ხარატიშვილი, ვახტანგ ხმალაძე.
აღნიშნული საკითხიც კომიტეტის სხდომაზე გიორგი კახიანმა გამოიტანა და ხელმოწერების ნამდვილობის შემოწმების პროცესზე, რომელიც თითქმის ერთი თვე გრძელდებოდა, ასევე შემოწმების შედეგებზე ინფორმაცია წარმოადგინა. მისი თქმით, ხელმოწერების ნამდვილობის ფორმალური და არაფორმალური შემოწმების შედეგად, გარკვეული ხარვეზები გამოვლინდა და ჯამში 26 386 ხელმოწერა ბათილად იქნა ცნობილი. საერთოდ კი, წარმოდგენილი იყო 228 559 ხელმოწერა, საიდანაც ნამდვილი ხელმოწერების რაოდენობა 202 173 აღმოჩნდა.
შესაბამისად, კომიტეტმა დადასტურებულად მიიჩნია არანაკლებ 200 ათასი ხელმოწერის ნამდვილობა, რაც, როგორც გიორგი კახიანმა აღნიშნა, არის საფუძველი იმისა, რომ მოხდეს კონსტიტუციური კანონპროექტის ინიცირება, რომელიც მომდევნო საპარლამენტო არჩევნების პროპორციული საარჩევნო სისტემის წესით ჩატარებას ითვალისწინებს.
ინფორმაციას საქართველოს პარლამენტის პრესსამსახური ავრცელებს.
მოგესალმებათ საინფორმაციო სააგენტო GUARDIANGE-ის ადმინისტრაცია და გაცნობებთ, რომ სააგენტოს განახლების შედეგად, ამიერიდან ვებგვერდის ძველ ვერსიაზე -WWW.GUARDIAN.GE ხელმისაწვდომი იქნება 2023 წლის 7 სექტემბრამდე განთავსებული საინფორმაციო ხასიათის წერილობითი/ფოტო/ვიდეო მასალა, ხოლო განახლებული სააგენტოს ვებგვერდს შეგიძლიათ გაეცნოთ WWW.GUARDIANGE.COM-ზე.
ამერიკის შეერთებული შტატების არჩეულმა პრეზიდენტმა დონალდ ტრამპმა ჯანდაცვისა და სოციალური მომსახურების მდივნად ვაქცინაციის მიმართ სკეპტიკურად განწყობილი რობერტ ფიცჯერალდ კენედი უმცროსი, პრეზიდენტ ჯონ კენედის ძმისშვილი დაასახელა, რითაც დაასრულა დიდი ხნის მითქმა-მოთქმა კენედის გარშემო იმის შესახებ, თუ რა თანამდებობას დაიკავებდა იგი ტრამპის ადმინისტრაციაში.