ვისაც სიხარულის განცდა აქვს, კარგად დაინახონ, რა დააკლდებათ, ერთი მხრივ დავკარგავთ პარტიულ-პროპაგანდისტულ ტელევიზიას, მაგრამ ასევე  დავკარგავთ კრიტიკის და პროგრესის ყველაზე მძლავრ იარაღს - ასეთი განცხადება გააკეთა  "შენების მოძრაობის" ლიდერმა დავით უსუფაშვილმა.

როგორც უსუფაშვილმა აღნიშნა, მისთვის ძალიან მძიმე იმის ყურება, რაც ახლა ხდება. მან გაიხსენა 1995 წელი, როდესაც "რუსთავი 2"- ის დამფუძნებელი ეროსი კიწმარიშვილი რუსთავიდან ჩამოვიდა და "ახალგაზრდა იურისტთა ასოციაციას" დახმარებით მიმართა.

"ძალიან მძიმეა დღეს ჩემთვის იმის ყურება, ადამიანურად, რასაც დღეს ვხედავთ, იმიტომ, რომ მახსენდება 1995 წელი, როდესაც ეროსი კიწმარიშვილი რუსთავიდან ჩამოვიდა, „ახალგაზრდა იურისტთა ასოციაციას“ მოგვაკითხა და ლია მუხაშავრიას ვთხოვეთ მისთვის დახმარება და „რუსთავი 2“- ად ჩამოყალიბდა ის გუნდი, რომელმაც საქართველოს პოლიტიკურ ისტორიაში ძალიან სერიოზული ფურცელი ჩაწერა უკვე.

მე ძალიან ვწუხვარ, რომ „რუსთავი 2“- ის ყველაზე მაგარი, პროფესიონალი, ოპერატიული, თანმიმდევრული გუნდი, ჟურნალისტების, ოპერატორების, ტექნიკური მუშაკებისა და უამრავი სხვა ადამიანის, დღეს არის ამ დღეში, ეს ტელევიზია ამ მდგომარეობამდე მიიყვანა ჩვენმა მოუწესრიგებელმა, დაულაგებელმა პოლიტიკურმა ცხოვრებამ. მიხეილ სააკაშვილმა ყველაზე დიდი ზიანი მიაყენა ტელევიზიას, როგორც ტელევიზიას იმ პერიოდში. "რუსთავი 2“-მა შვიდი წელი გაძლო ახალი ხელისუფლების პირობებში, არ იყო მარტივი, რომ აქამდე მოეღწია, თუნდაც ასეთ პირობებში, მაგრამ დღეს, უკვე ჩვენ გვაქვს ახალი სამართლებრივი რეალობა, ესაა სტრასბურგის სასამართლოს გადაწყვეტილებით შექმნილი ახალი რეალობა, იმაზე ლაპარაკი, რომ ეს გადაწყვეტილება რაღაც სხვა რამის გამოა მიღებული, ეს არის დიდი უპასუხისმგებლობა, სწორედ სტრასბურგის გადაწყვეტილებით მაუწყებლობდა „რუსთავი 2“ ორ წელიწად ნახევარი, მაგრამ სტრასბურგსაც აქვს ლიმიტები და ბოლოს მიიღო ის გადაწყვეტილება, რაც მიიღო.

როგორც ჩანს, ყოველი დღე უზენაესი სასამართლოს გადაწყვეტილებიდან დღემდე, სხვა მხარისთვის მოუთმენელი იყო და ვისაც ახლა სიხარულის განცდა აქვს - აი ახლა ხომ აღარ მოვისმენთ იმ უბედურებას, რაც იქიდან გვესმოდა, ამ ადამიანებმა ახლა კარგად დაინახონ რა დაგვაკლდება ჩვენ, „რუსთავი 2 „ თუ აღარ იქნება ეთერში, ჩვენ, ერთი მხრივ, დავკარგავთ პარტიულ პროპაგანდისტ ტელევიზიას, რომელსაც კარგია, რომ დავკარგავთ, მაგრამ მეორე მხრივ ვკარგავთ თავისუფლების, კრიტიკის, პროგრესის და მომავლის უზრუნველმყოფელ მძლავრ იარაღს", - განაცხადა უსუფაშვილმა.