„ნაციონალური მოძრაობის“ წევრმა, დეპუტატმა, რომან გოცირიძემ განაცხადა. რომ დეპუტატ ეკა ბესელიას მიმართ განხორციელებული შეტევა „რუსთავი 2“-ის საკითხის გადაფარვისთვის არის გამიზნული.

როგორც გოცირიძე განმარტავს, ხელისუფლებას წინ სხვა თემების წამოწევა სურს.

„უნდათ, რაღაც სხვა თემები წამოწიონ, მაგრამ ავიწყდებათ, რომ ნებისმიერი მსგავსი საკითხის წამოწევა პირდაპირ ანგრევს „ქართული ოცნების“ იმიჯს, რადგან მათი დანაშაული აშკარად იგრძნობა. შვიდი წლის განმავლობაში არც ერთი საქმე არ გამოიძიეს, რომელიც ფარულ ჩანაწერებს ეხებოდა და ახლაც ამბობენ, რომ თურმე, სიკვდილმისჯილმა ადამიანმა ვიდეო სომხეთის ციხიდან გაავრცელა. ვინ შეუტანა ეს ტელეფონი, საიდან აღმოაჩნდა, ან რატომ არ იძიებენ, ან რატომ ახსენდებათ მას შემდეგ, რაც ბესელია ამ საკითხის გამოძიებას ითხოვს? ესეც იმის მაჩვენებელია, რომ ხელისუფლებას უნდა, ეს თემა დავიწყებას მიეცეს.

რაც შეეხება ბრალდებას, რომ თურმე, „ქართული ოცნების“ შეხვედრებიდან ინფორმაცია ეკა ბესელიას გამოჰქონდა, მაშინ ყოჩაღ, „რუსთავი 2“. თურმე, ცინცხალ ინფორმაციას გვაწვდიდნენ „ქართული ოცნების“ ყველა შეხვედრიდან. ამით ტელევიზიას წონას და ღირსებას მატებენ, თუმცა რამდენად სწორია ის ფაქტი, რომ წყარო ბესელია იყო, არ მგონია, ასე იყოს, რადგან „რუსთავი 2“-ს ინფორმაციების მოძიებების უამრავი წყარო ჰყავს და ერთ წყაროს არ დაეყრდნობოდა“, – განცხადა გოცირიძემ.