პარლამენტის ყოფილმა თავმჯდომარემ, „შენების მოძრაობის“ დამფუძნებელმა, დავით უსუფაშვილმა ტელეკომპანია პირველის ეთერში განაცხადა, რომ ირაკლი ოქრუაშვილის საუბრიდან ერთი დასკვნის გამოტანა შეიძლება - მიზეზი იმის, რომ ივანიშვილის და სააკაშვილის სისტემა "ქურდულ სამყაროს" ებრძვის, არის ის, რომ მათ თავად სურთ ქურდული წესებითა და კანონებით ყველაფრის გარჩევა.

„2004-2008 წლებში სააკაშვილ-ივანიშვილის ურთიერთობის სტილი, მეთოდები, იქ რაღაც ტელევიზიების გადაცემა-გადმოცემა, პატარკაციშვილს მიჰქონდა და სულზე მიასწრეს, პატარკაციშვილის მიჰქონდა, ეს ნიშნავს - ჟვანიას მიჰქონდა, იმიტომ, რომ ჟვანია-პატარკაციშვილი მაშინ ერთად მოიაზრებოდნენ, ამიტომ რაღაცა ჯგუფმა ჩაავლო ხელი და აქეთ წამოიყვანა, მერე იმ რაღაც ჯგუფს ივანიშვილმა თავისი ტელევიზიაც მიახმარა და კიდე უამრავი მილიონები, ისევ ამ რაღაცა ურთიერთობებში.

სააკაშვილი-ივანიშვილის დღევანდელი ჯახი, ეს ორპოლუსიანობა, ქვეყნის გახლეჩვა, შავი და თეთრი, ხალხს რომ ერთმანეთის აღარ ესმის და ქვეყანას რომ უფსკრულში ვაყენებთ, აი, იმ ოთხ წელიწადში რაღაცეების ვერ დაკმაყოფილება, მოგვარება, ერთმანეთში ვერ გარკვევის თემები გადმოვიდა ასე, მათთვის ბუნებრივად აქეთ, ამ ცხოვრებაში და ისევ იმ დაუკმაყოფილებელ ვნებებს ეწირება საქმე ივანიშვილ-სააკაშვილის 2004-2008 წლებში რაც ხდებოდა, და თურმე მეც და სხვებიც ვართ ამათი ურთიერთობების და უწესო შეჯახების მსხვერპლი. ირაკლის საუბრიდან გამოდის, რომ ერთი სისტემაც, სააკაშვილის და მეორე - ივანიშვილის "ქურდულ სამყაროს" თურმე ერთადერთი მიზეზით ებრძვის- ჩვენ უნდა ვიყოთ ქურდები, აქ სხვას ვერ მოვითმენთო, ქურდული წესებით და კანონებით უნდა გავარჩიოთ ყველაფერიო. რას ვერჩით ფარცხალაძეს მაშინ?! - განაცხადა უსუფაშვილმა.