დასამალი არ არის, საჯაროდაც ერთ-ერთ ინტერვიუში ამაზე საუბრობდა ბიძინა ივანიშვილი და გამოჩნდა ეს განწყობა. ძალიან ძნელია დღეს ამტკიცოს საგამოძიებო ორგანოებმა და მმართველმა პარტიამ რომ ეს საქმე თავისუფალია პოლიტიკური გავლენებისგან, - ასე გამოეხმაურა გადაცემა „რეაქციაში“ პარტია „სამართლიანობისთვის“ ლიდერი, დეპუტატი ეკა ბესელია „თი-ბი-სი“  ბანკის დამფუძნებლის მამუკა ხაზარაძის დაკავების საქმეს.

ბესელიას განცხადებით, ხელისუფლება მსგავსი საქციელებით სისუსტის დემონსტრირებას ახდენს.

„ერთიან კონტექსტში განვიხილავ ყველაფერს, მთლიან სურათს ვუყურებ და გამიჩნდა განცდა, რომ ყველაფერი ნანახი მაქვს და ეს მაგონებს იმ ფაზას, როდესაც ხელისუფლება სისუსტის დემონსტრირებას ახდენს ძალადობრივი გამოვლინებებით, რაღაცნაირად დაემსგავსნენ ერთმანეთს და ბევრი პარალელის გავლება შემიძლია,  ჩემთვის ეს სურათი იკითხება უკვე ასე, რომ დღეს „ქაართული ოცნება“ ნელ-ნელა უკვე დაემსგავსა იმ პოლიტიკურ ძალას, რომელსაც ეჭიდებოდა“,  განაცხადა მან.

დეპუტატის თქმით, ირაკლი ოქრუაშვილისა და მამუკა ხაზარაძის დაკავება პოლიტიკურად მოტივირებულია და ის მორიგ დაკავებებსაც ელოდება.

„არ არის ეს კლასიკურად ფულის გათეთრების საქმე, აქ აშკარად პოლიტიკური განწყობები მძლავრობს“ , განაცხადა დეპუტატმა.

ეკა ბესელიამ ჟურნალისტის, ინგა გრიგოლიას ინფორმაცია დაადასტურა იმის შესახებ, რომ ცნობილ დახურულ შეხვედრაზე, რომელიც „ქართული ოცნების“ ოფისში გაიმართა, გიორგი კვირიკაშვილთან მამუკა ხაზარაძის სახელი და გვარი ნახსენები იყო, როგორც პრეტენზია.

„დახურული სხდომის დეტალებზე ვერ ვისაუბრებ, მაგრამ ის, რომ კრიტიკული და უარყოფითი განწყობა გამოჩნდა ამ პროექტისა და ამ პროექტის სათავეში მყოფ პიროვნებასთან დაკავშირებით, დასამალი არ არის, საჯაროდაც ერთ-ერთ ინტერვიუში ამაზე საუბრობდა ბიძინა ივანიშვილი და გამოჩნდა ეს განწყობა. ძალიან ძნელია დღეს ამტკიცოს საგამოძიებო ორგანოებმა და მმართველმა პარტიამ, რომ ეს საქმე თავისუფალია პოლიტიკური გავლენებისგან“ , განაცხადა ბესელიამ.

მან თავის ყოფილ პარტიას დაფიქრებისკენ და დადინჯებისკენ მოუწოდა და განაცხადა, რომ ეს ამბავი ამით არ დასრულდება.