„ლეიბორისტული პარტიის“ წევრმა, გიორგი გუგავამ „გამარჯვებული საქართველოს“ ოფისში გამართულ ერთობლივ ბრიფინგზე ირაკლი ოქრუაშვილის დაკავებასთან დაკავშირებით განცხადება გააკეთა.

როგორც გუგავამ აღნიშნა, მისი აზრით, ოქრუაშვილის დაკავება „რუსთავი 2“ - თან დაკავშირებულ განცხადებებს ეხება.

„პოლიტიკური მოწინააღმდეგის, პოლიტიკური ოპონენტის უსაფუძვლო ბრალდებებით დაპატიმრება არის მცდელობა, კრემლიდან დანიშნულმა მეფისნაცვალმა, ივანიშვილმა ქვეყანაში დაამყაროს დიქტატურა. მცდელობაა, ეს ვერ გაუვა. რა თქმა უნდა, ირაკლი ოქრუაშვილის დაპატიმრებას არანაირი რეალური საფუძველი არ უდევს გარდა იმისა, რომ დიდი ალბათობით, დასტურდება მის მიერ გამოქვეყნებული დოკუმენტის ნამდვილობა „რუსთავი 2“-ის მესაკუთრეობასთან დაკავშირებით. მეორე, რამაც ალბათ ყველაზე მეტად აღაშფოთა ივანიშვილი, გახლავთ ის, რომ ირაკლი ოქრუაშვილმა ამხილა ის უკანონო ქმედებებში, რომელსაც ეს რეჟიმი ჩადის. ესაა შეთხზული საქმეები, შეკერილი საქმეები, პროკურატურისა და სასამართლოს მართვა ერთპიროვნულად შუშის სასახლიდან. მან სწორედ ამის გამო დაიწყო დევნა პოლიტიკური ოპონენტების“, – განაცხადა გუგავამ.

გუგავას თქმით, პოლიტპატიმრები აუცილებლად გათავისუფლდებიან და ივანიშვილი პასუხისგებაში მიეცემა.

„ის აუცილებლად დაიმძიმებს თავის განაჩენს, პოლიტპატიმრები აუცილებლად გათავისუფლდებიან მალე, ხოლო ივანიშვილი და მისი ბანდა მიეცემა პასუხისგებაში იმ გამყიდველური ქმედებების გამო, რომელსაც ქვეყნისა და ხალხის წინაშე ჩადის“, – განაცხადა გიორგი გუგავამ.