სამოქალაქო ბიუჯეტის პროგრამის ფარგლებში, წყალტუბოს მუნიციპალიტეტის მერია მუნიციპალიტეტის ტერიტორიაზე მცხოვრებ მოქალაქეებს საშუალებას აძლევს მონაწილეობა მიიღონ მუნიციპალიტეტის ბიუჯეტის დაგეგმვაში.

სამოქალაქო ბიუჯეტის არსიდან გამომდინარე, მოსახლეობას შესაძლებლობა აქვთ თავად გადაწყვიტონ ამა თუ იმ უბანზე, ქუჩაზე, ჩიხში, საერთო საცხოვრებელი და კორპუსების ეზოებში, სხვადასხვა ინფრასტრუტურული პროექტების განხორციელება. რაშიც 2019 წლის ბიუჯეტიდან დაიხარჯება 390 000 ლარი.

აღნიშნული პროცესი ექვს ეტაპს მოიცავს და 10 ივლისიდან 1 ოქტომბრამდე გრძელდება. ამ ხნის განმავლობაში კი მოსახლეობა მათთვის პრიორიტეტულ პროექტებს შეარჩევს.

სამოქალაქო ბიუჯეტის საბჭოს მიერ, უკვე მომზადებულია პროგრამის განვითარების გეგმა, შემუშავებულია ახალი ფორმირების წესი და სააპლიკაციო ფორმა, რომლის საშუალებითაც მოქალაქეები საკუთარ ინიციატივებს წარმოადგენენ.

საპროექტო ინიციატივის წარმოდგენის უფლება აქვს საქართველოს ყველა მოქალაქეს 14 წლის ასაკიდან, რომელიც რეგისტრირებულია ქალაქ წყალტუბოს ტერიტორიაზე.
ადგილობრივი ბიუჯეტიდან გამოყოფილი 390 000 (სამასოთხმოცდაათიათასი) ლარი გადანაწილდება თანაბრად ქალაქ წყალტუბოს სამ ზონაზე, თითოსთვის 130 000 (ასოცდაათიათასი) ლარის ოდენობით.

,,სამოქალაქო ბიუჯეტი 2020-ის“ ფარგლებში განსახორციელებელი პროექტების ნუსხა წლის ბოლოს დასამტკიცებლად საკრებულოს წარედგინება.

საპროექტო ინიციატივების ჩაბარება მოქალაქეებს შეუძლიათ ზონის კოორდინატორების დახმარებით, წყალტუბოს მუნიციპალიტეტის მერიის კანცელარიაში.

ზონის კოორდინატორები საკრებულოს მაჟორიტარ დეპუტატებთან ერთად აქტიურად ატარებენ საინფორმაციო კამპანიას.