მმართველობის ნაწილში პრობლემის არსი სწორედ იმაშია, რომ ყოველ ცისმარე დღეს, საქართველოს პოლიტიკური ლიდერის მაგიდაზე შესაძლოა დევს 37-საკითხიანი ჩამონათვალი, მაგალითად ლარის კურსი, გამოძიება და ა.შ. ქვეყანა მაშინ იმართება სწორად, როცა ოცდაჩვიდმეტივე საკითხზე ხდება მყისიერი რეაგირება, - განაცხადა „შენების მოძრაობის“ ლიდერმა დავით უსუფაშვილმა „ტელეკომპანია პირველის“ ეთერში.

მისი თქმით, ქვეყანაში არსებული პრობლემების გადაჭრისთვის პრემიერ მინისტრი ვერაფერს აკეთებს, რეალურ მმართველს კი პასუხის გაცემა ოფიციალურად არ ევალება, რის გამოც პრობლემები გადაუჭრელი რჩება და უფრო ღრმავდება.

„37-ვე საკითხს სჭირდება 37 შეხმიანება, ჩვენს რეალობაში რეალური მმართველი ამ 37 საკითხიდან თავისი რადარიდან ხედავს 5-ს, იმ 5 საკითხზე ვიღაცას ურეკავს, რაღაცას აკეთებს, სწორად თუ არასწორად და 32 საკითხი რჩება საერთოდ რეაგირების გარეშე, იმიტომ, რომ ვითომ პრემიერ მინისტრი ვერაფერს აკეთებს ამ თემებზე და რეალური მმართველი - იმიტომ, რომ არ ზის იმ ადგილზე სადაც უნდა იჯდეს, ოფიციალურად არ ევალება ამ თემებზე პასუხის გაცემა, ყოველ მეორე დღეს ჟურნალისტისვის არ აქვს პასუხი გასაცემი საკითხზე, ყოველ მესამე დღეს მთავრობის სხდომას არ ატარებს, არ ხვდება უცხოეთის წარმომადგენლებს, ბიზნესმენებს, მოსახელობას და ამიტომ გადაუწყვეტელად დატოვებული 37 საკითხი  ღრმავდება და მიდის სადღაც.

მაგალითად, გარეჯის თემა არის კლასიკა, უმწვავესი და ფეთქებადსაშიში თემა, რომელიც მიტოვებულია უპატრონოდ, იმიტომ, რომ ვითომ პრემიერ მინისტრი ამ საკითხს ვერ იღებს, პრეზიდენტმა ამ საკითხში პოლიტიკურად უკვე გაამწვავა ყველაფერი, რისი გამწვავებაც შეეძლო და ახლა ამბობს, რომ კომისიამ იმუშაოსო, მაშინ, როდესაც სწორედ კომისიებს უნდა ემუშავათ, სანამ პოლიტიკურად აიწეოდა ეს თემა, იმიტომ, რომ ეს საკითხი რომ მოუგვარებელია და მხარეებს სხვადასხვა პოზიცია აქვთ, ეს ცნობილია ყველასთვის“ , - განაცხადა უსუფაშვილმა.