„რუსთავი 2“-ის გენერალური დირექტორი პაატა სალია მისი წინამორბედის, ნიკა გვარამიასთვის 5 მილიონი დოლარის კომპენსაციის გადახდას არ აპირებს და გვარამიას ლონდონის საარბიტრაჟო სასამართლოსთვის მიმართვას ურჩევს.

„არ მინახავს ეს კონტრაქტი და არ ვიცი რაზე საუბრობს გვარამია. მიმართოს ლონდონის არბიტრაჟს და თუ მიგვიწვევენ მხარედ, აუცილებლად გავცემთ პასუხს სასამართლოში. ამ კომპანიაში ძალიან ბევრი ისეთი ხელშეკრულებაა დადებული, რომელიც კომპანიის ინტერესების საზიანოა და ამაზე თავის დროზე დასკვნები აუცილებლად გაკეთდება. ამ ეტაპზე ვნახე რამდენიმე ხელშეკრულება, რომლებიც ძალიან ბევრ ეჭვს ბადებს, თუ რატომ გაფორმდა“, განაცხადა პაატა სალიამ.

მან ასევე აღნიშნა, რომ მნიშვნელოვანია, „რუსთავი 2“ იყოს მაქსიმალურად კრიტიკული, თუმცა არხზე „ფეიკ ნიუსი“ არ უნდა იყოს.

„ჩემთვის მნიშვნელოვანია, არხი იყოს კრიტიკული, უბრალოდ ჩემი სურვილია, ეს კრიტიკა იყოს მაქსიმალურად დასაბუთებული და არ იყოს მხოლოდ და მხოლოდ სიტყვები. საუბარი მაქვს პროფესიონალურ კრიტიკაზე. მე ვთვლი, რომ ჩვენი არხი უნდა იყოს გამორჩეული მაღალი პროფესიონალიზმით. ვგულისხმობ იმას, რომ მაქსიმალური კრიტიკა, მაგრამ მაქსიმალური ობიექტურობის და მაქსიმალური სიმართლის ფარგლებში, ანუ ეს კრიტიკა არ უნდა დაემსგავსოს რაღაც ტყუილების გავრცელებას, „ფეიკ ნიუსი“ არ უნდა იყოს „რუსთავი 2“- ზე.

მე ვთვლი, რომ „რუსთავი 2“ უნდა იყოს მაქსიმალურად კრიტიკული და ეს კრიტიკა მაქსიმალურად დასაბუთებული უნდა იყოს, რაც კრიტიკის ობიექტს არ მისცემს შესაძლებლობას, რომ ბრალდებები ჰქონდეს ჩვენი ტელევიზიის მიმართ“, განაცხადა სალიამ.

ნიკა გვარამიამ „რუსთავი 2"-ის გენერალური დირექტორის პოსტიდან ვადაზე ადრე გათავისუფლებისა და კონტრაქტის დარღვევის გამო, კიდევ ერთხელ მოითხოვა, რომ სამაუწყებლო კომპანიის ახალმა ხელმძღვანელობამ მას კომპენსაციის სახით 5 მილიონი დოლარი უნდა გადაუხადოს.