გენერალური პროკურატურა „ქართული ოცნების“ მთავრობის ყოფილი მაღალჩინოსნების, კვირიკაშვილის მთავრობის პირველი ვიცე-პრემიერის დიმიტრი ქუმსიშვილის და რეგიონული განვითარებისა და ინფრასტრუქტურის მინისტრის, ზურაბ ალავიძის, ასევე ღარიბაშვილის პრემიერ მინისტრობის დროს რეგიონული განვითარებისა და ინფრასტრუქტურის მინისტრის, დავით შავლიაშვილისა და მისი გარემოცვის გამოკითხვაზე დაბარებას გეგმავს და არ არის გამორიცხული მათ ახლო მომავალში ბრალიც წარუდგინონ.

პროკურატურის მიერ აღძრული სისხლის სამართლის საქმე, რომლის ფარგლებშიც გასულ წელს უკვე დაიკითხნენ გიორგი კვირიკაშვილის მთავრობის მინისტრები დიმიტრი ქუმსიშვილი და ზურაბ ალავიძე, „კურიერის“ ინფორმაციით, ეხება 710 მილიონის ღირებულების ტენდერს, რაც შესაძლოა, ყოფილი პირველი ვიცე-პრემიერის, დიმიტრი ქუმსიშვილისა და ასევე ყოფილი რეგიონული განვითარებისა და ინფრასტრუქტურის მინისტრის, ზურაბ ალავიძისთვის ბრალის წარდგენის მიზეზი გახდეს.

„კურიერის“ ცნობით, ტენდერი სამტრედია-გრიგოლეთის 57კმ-იანი გზის ასაშენებლად იყო გამოცხადებული, აღნიშნული სოლიდური თანხა (710 მილიონი) საქართველოს მთავრობას ევროპის საინვესტიციო ბანკმა სესხის სახით მისცა, სამუშაოების ნაწილის ჩასატარებლად კი ერთ-ერთმა უკრაინულმა კომპანიამ ხელისუფლებისაგან ფული წინასწარ მიიღო, თუმცა სადღეისოდ არც გზა არის აშენებული და ქართული სახელმწიფოსთვის არც ის რამდენიმე ათეული მილიონია უკან დაბრუნებული (47 მილიონი), რომელიც უკრაინულმა კომპანიამ, "ალტოკომმა" ავანსად მიიღო.

საქართველოს მთავარი პროკურატურის მიერ გამოძიება ეკონომიკისა და მდგრადი განვითარების და რეგიონული განვითარებისა და ინფრასტრუქტურის სამინისტროებში ცალკეულ მოხელეთა მიერ სამსახურებრივი უფლებამოსილების ბოროტად გამოყენებისა და დიდი ოდენობით საბიუჯეტო თანხების მართლსაწინააღმდეგოდ მითვისების ფაქტებზე მიმდინარეობს.