ვინაიდან, ჩვენი ამოცანაა, საზოგადოებამ გააკეთოს უფრო მეტად ინფორმირებული არჩევანი და კონკრეტულ ხედვაზე დაფუძნებით მიიღოს გადაწყვეტილება - რომელ პარტიას დაუჭიროს მხარი, ალბათ ვთანხმდებით იმაზე, რომ ეს დამოკიდებულია კონკრეტული პარტიის იდეოლოგიასა და ხედვაზე, - განაცხადა  იურიდიულ საკითხთა კომიტეტის თავმჯდომარემ, ანრი ოხანაშვილმა "ტელეკომპანია პირველის" ეთერში.

როგორც ოხანაშვილმა აღნიშნა, საზოგადოებას კონკრეტულ იდეოლოგიაზე დაფუძნებული პარტიები სჭირდება, ბლოკის დატოვების შემთხვევაში კი ერთი დიდი პარტიის ქვეშ ექცევიან პატარა პარტიები და მისი იდეოლოგიაც იჩრდილება.

"თუკი ჩვენ საარჩევნო ბლოკებს დავტოვებთ, გამოცდილება გვიჩვენებს, რომ ერთი დიდი პარტია მიითვისებს კონკრეტულ პატარა პარტიებს, თუნდაც მათ ჰქონდეთ გარკვეული პოლიტიკური იდეოლოგია და პლატფორმა. ჩვენს საზოგადოებას აქვს არა მრავალფეროვანი არჩევანის შესაძლებლობა, არამედ მხოლოდ რამდენიმე პოლუსიანი არჩევანის შესაძლებლობა და შესაბამისად, ჩვენს საზოგადოებას არ აქვს შესაძლებლობა, მეტი არჩევანის გააკეთოს. ჩვენს საზოგადოებას ჭირდება კონკრეტულ იდეოლოგიაზე დაფუძნებული პარტიები და თუკი ჩვენ დავტოვებთ ამ ბლოკებს, გამოცდილება გვიჩვენებს, რომ ერთი დიდი პარტიის ქვეშ ექცევა პატარა პარტია და იჩრდილება მისი იდეოლოგია, პლატფორმა და შესაბამისად, არ აძლევს პარტიული განვითარების შესაძლებლობას. აქედან გამომდინარე, ჩვენ ნულოვან ბარიერზე ვთანხმდებით, ჩვენ ვამბობთ რომ პარტიას არ დასჭირდება კონკრეტული ბარიერის გადალახვა, ამით ვაძლევთ შესაძლებლობას ყველა პატარა პარტიას, კიდევ უფრო განავითაროს საკუთარი პლატფორმა" , - განაცხადა ანრი ოხანაშვილმა.