სახელები და გვარებიც შემიძლია ჩამოგითვალოთ, ვისით ჩაგანაცვლებენ თითოეულ თქვენგანს, - ასე მიმართა „რუსთავი 2“ - ის ჟურნალისტებს „ტვ პირველის“ გენერალურმა პროდიუსერმა, ჟურნალისტმა ინგა გრიგოლიამ.

როგორც გრიგოლიამ განაცხადა, მან ზუსტად იცის, რომ „ტელეკომპანია პირველის“ დამფუძნებელი პროკურატურაში იმისთვის დაიბარეს, რომ არხი გააჩერონ.

„პირდაპირ მინდა გითხრათ, რომ მას მერე რაც ხელისუფლებამ ჯიბეში ჩაიდო „რუსთავი 2“, არ მაქვს იმის მოლოდინი, რომ თქვენ დიდი ხანი გამუშავებენ „რუსთავი 2“- ზე, სახელები და გვარებიც შემიძლია ჩამოგითვალოთ, ვისით ჩაგანაცვლებენ თითოეულ თქვენგანს, იმიტომ, რომ ყველამ ყველაფერი ვიცით, ყველანაირი გეგმის შესახებ, მას შემდეგ, რაც „რუსთავი 2“ ჩაიდეს ჯიბეში, იფიქრეს, რომ ბარემ აგვისტოა რა, ბარემ „ტვ პირველიც“ მივაყოლოთ, ახალი ალბათ არცეთი თქვენგანისთვის არ იქნება, რომ „ტელეკომპანია პირველზე“ იყო კულუარული მცდელობები და შეტევები, რაზეც მე არ ვისაუბრებ, ამაზე უნდა ისაუბროს არხის დამფუძნებელმა, მაშინ, როდესაც ის ამას საჭიროდ ჩათვლის. მე ზუსტად ვიცი, რომ ახლა იმიტომ დაიბარეს ვახტანგ წერეთელი რომ „ტვ პირველი“ გააჩერონ, მე მინდა გითხრათ, რომ ვერ გააჩერებთ! „ - განაცხადა ინგა გრიგოლიამ.