კორუფციის ეჭვი აქ ობიექტურად არ შემოდის, აქ პროკურატურა ცდილობს აი, ამ ბინების გამოჩენით ფონი შექმნას, თორემ სამართლებრივი თვალსაზრისით ეს იყო სრულიად ლეგალური კონტრაქტი, - განაცხადა ადვოკატმა ბექა ბასილაიამ „ტვ პირველის“ ეთერში.

მისი თქმით, პროკურატურა მოქმედებს, როგორც პიარ-ორგანო და აღნიშნულ საკითხს ნიკა გვარამიასთვის ბრალის წარდგენასთან არანაირი კავშირი არ აქვს.

„პროკურატურის განცხადებიდანვე იკვეთება, რომ ამ საკითხზე სამართლებრივ შეფასებას არ აძლევენ, მაშინ რატომ მოხდა ამ საკითხზე ხაზგასმა პროკურორის მხრიდან ბრიფინგზე? იმიტომ, რომ პროკურატურა მოქმედებს, როგორც პიარ-ორგანო, როგორც პროპაგანდისტული ორგანო და ამ საკითხს არანაირი შემხებლობა იმ ბრალდებასთან, რის წარდგენასაც ნიკა გვარამიასთვის აპირებენ, არანაირი კავშირი არ გააჩნია, ანუ ის, რომ ერთმა კომპანიამ ერთ პირს გადასცა ბინები, სასესხო ვალდებულებების სანაცვლოდ, აქ შეუძლებელიც კია რაიმე კრიმინალზე საუბარი.

„რუსთავი 2“ მანამდეც, ვიდრე ნიკა გვარამია გახდებოდა მისი გენერალური დირექტორი, და სხვა კომპანიებიც, რომლებთანაც გვარამიას შემხებლობა არ ჰქონია, იყვნენ „ინტერმედიას“ კლიენტები, მათ შორის, სულ რამდენიმე წლის წინ ტელეკომპანია „იმედიც“ უკვეთდა „ინტერემედიას“ სარეკლამო დროის გაყიდვას. „ინტერმედია“ ეს არის რეალური კომპანია, რომელიც სარეკლამო დროის გაყიდვით არის დაკავებული სხვადასხვა სარეკლამო სააგენტოებზე და არის წარმატებული, ბაზარზე დამკვიდრებული კომპანია. კორუფციის ეჭვი აქ ობიექტურად არ შემოდის, აქ პროკურატურა ცდილობს აი, ამ ბინების გამოჩენით ფონი შექმნას, თორემ სამართლებრივი თვალსაზრისით ეს იყო სრულიად ლეგალური კონტრაქტი“ , - განაცხადა ბექა ბასილაიამ.