ნათელი გახდა, რომ ოცნების ხელისუფლება დაადგა ზუსტად იგივე გზას ამ კვალის აბნევით, მფლობელების ცვლილებით, რაც თავის დროზე გააკეთა „ნაციონალურმა მოძრაობამ“, - განაცხადა „რუსთავი 2“ - ის დამფუძნებელმა დავით დვალმა „ტვ პირველის“ ეთერში ქიბარ ხალვაშის განცხადების კომენტირებისას.

„მინდა, ვუთხრა კონკურსში მონაწილეებს, რომ არანაირად არ გამოვა, ისინი გამოვიდნენ კეთილსინდისიერი მყიდველები, ეს საქმე არის დავაში, ია კიწმარიშვილი აპირებს დავას და მე და ჯარჯიც არ შევეგუებით იმას, რომ რაღაც შუალედურ რბოლამდე ჩამოვიდა მფლობელების ჯაჭვში  „რუსთავი 2“ და ჩაითვალოს, რომ სამართლიანობა აღდგენილია.

ჩვენ ვაგრძელებთ ბრძოლას და ვთვლით, რომ „ქართული ოცნების“ ხელისუფლებამ ისევე უკანონოდ მიიტაცა ეს ტელევიზია, როგორც „ნაციონალურმა მოძრაობამ“, - განაცხადა დვალმა.

ის დარწმუნებულია, რომ არხის მომავალი მფლობელი უკვე ცნობილია და გამოცხადებული კონკურსი მხოლოდ ფორმალობაა.

„მე მგონია, რომ მომავალი მფლობელი უკვე ცნობილია და ეს ე.წ. კონკურსი არის ფორმალობა, დარწმუნებული ვარ, მაგრამ თუ ეს ასე არ არის, რა თქმა უნდა გაკოტრების სქემაც შეიძლება გამოვრიცხოთ, გაკოტრება არის ბოლო, რაზეც ხელისუფლება წავა „რუსთავი 2“ - თან დაკავშირებით.

მთელი ამ პერიოდის განმავლობაში ვცდილობდი, რომ ამერიდებინა თავი ქიბარის მიმართ პრეტენზიის გამოთქმისთვის, რადგან მესმის, რომ ეს გადაწყვეტილებები სხვაგან და სხვა დონეზე მიიღება, პირდაპირ რომ ვთქვათ, ეს ივანიშვილის გადაწყვეტილებაა, დღეს მინდა ვთქვა, რომ ძალიან ცუდი როლის შესრულება უწევს ქიბარ ხალვაშს უკვე მეორედ ამ ტელევიზიასთან დაკავშირებით, ის უკვე მეორედ მონაწილეობს „რუსთავი 2“ - ის განადგურებაში", - განაცხადა დავით დვალმა.