რუსეთისა და ამერიკის შეერთებული შტატების პრეზიდენტებს,  ვლადიმერ პუტინსა და  ბარაქ ობამას შორის უახლოეს მომავალში პირისპირ შეხვედრა არ იგეგმება. ამის შესახებ თეთრ სახლში აცხადებენ.


ობამას ადმინისტრაციის წარმომადგენელთა ცნობით, მსგავსი შეხვედრისთვის მზადება არ მიმდინარეობს.


რუსეთის საგარეო საქმეთა მინისტრი სერგეი ლავროვი არ გამორიცხავს, რომ გაეროს გენერალურ ასამბლეაში მონაწილეობის მისაღებად ნიუ-იორკში ჩასული ვლადიმერ პუტინი ბარაქ ობამას შეხვდეს. ლავროვი „შესაბამის სიგნალს“ ამერიკული მხარისაგან ელოდება.


„ჩვენი ამერიკელი კოლეგები გვიგზავნიან სიგნალებს, რომ მათ კონტაქტების გაგრძელების სურვილი აქვთ. თუ ასეთი წინადადება იქნება, ვფიქრობ, ჩვენი პრეზიდენტი მას კონსტრუქციულად განიხილავს“, – განუცხადა ლავროვმა ჟურნალისტებს სევასტოპოლში ყოფნის დროს.

რუსეთის პრეზიდენტი, ვლადიმერ პუტინი ნიუ-იორკში, გაერო-ს გენერალური ასამბლეის 70-ე სესიაზე დასწრებას გეგმავს. რუსული მედიის ინფორმაციით, ამის შესახებ რუსეთის ფედერაციის საგარეო საქმეთა მინისტრმა, სერგეი ლავროვმა განაცხადა.


"პრეზიდენტი გეგმავს გაერო-ს გენერალური ასამბლეის 70-ე სესიას დაესწროს. წელს ამ ფორუმის შვიდ ათეულ წელს აღვნიშნავთ, რომელიც მეორე მსოფლიო ომში გამარჯვების შემდეგ შეიქმნა", -აღნიშნა ლავროვმა.


ვლადიმერ პუტინი პრეზიდენტის რანგში უკანასკნელად ამერიკის შეერთებულ შტატებში 2007 წელს იმყოფებოდა. 2012 წლის შემდეგ, როდესაც ის კიდევ ერთხელ გახდა რუსეთის პრეზიდენტი, არც ერთხელ არ ყოფილა შეერთებულ შტატებში.