ამ ყველაფრის მერე თუ ივანიშვილი მართლა განიხილავს გახარიას დაწინაურებას, რასაც არ გამოვრიცხავ, ეს არის კიდევ ერთი მტკიცებულება იმის, რომ მას არანაირი შეხება აღარ აქვს ქართველი ხალხის მაჯისცემასთან, - განაცხადა  „ევროპული საქართველოს“ წევრმა, დეპუტატმა სერგი კაპანაძემ "ტვ პირველის" ეთერში.

„ის თავის შუშის სასახლეში რაღაც კოლბაშია ჩაკეტილი და ვერ ხედავს, რეალურად რა ხდება, იმიტომ, რომ მას ახლა ალბათ ჰგონია, რომ ჩაცხრა პროტესტი და ხალხი აღარ გამოდის, მას ჰგონია, რომ ოპოზიცია დააშინა, ზოგი დაიჭირა, ზოგს სამაჯური შეაბა და ამიტომ, აღარ არის სახიფათო, ალბათ ჰგონია, რომ „რუსთავი 2“ დახურა, აქ „ტვ პირველს“ უტევს, მედია გაანეიტრალა და თავის ალტერნატიულ რეალობას შესთავაზებს ხალხს, და ალბათ ფიქრობს, რომ ამ კონტექსტში გახარიას წინ წამოწევა მას შეუძლია და გაუვა.

იფიქროს ასე, უბრალოდ ეს ყველაფერი უკან შემოტრიალდება, ამაში სრულიად დარწმუნებული ვარ, მაგრამ, კიდევ ერთი დადასტურება იქნება, რომ სრულიად არაადეკვატური გახდა ეს კაცი, მაგრამ საბოლოო ჯამში არ აქვს მნიშვნელობა, პრემიერ მინისტრი გახარია იქნება თუ ბახტაძე“ , - განაცხადა მან.

ჟურნალისტის შეკითხვას, თუ რატომ ცვლის ივანიშვილი ბახტაძეს გახარიათი, სერგი კაპანაძემ უპასუხა, რომ ჩანაცვლებას ბიძინა ივანიშვილი მხოლოდ საკუთარი სიძლიერის დემონსტრირებისთვის გააკეთებს.

„ივანიშვილი ახლა იმ რეჟიმშია, რომ უნდა აჩვენოს ის, რითაც იტყუებს თავს, რომ ძლიერია და ეს სიძლიერის დემონსტრირება კი არ შესუსტდა 20 ივნისის მერე, არამედ უფრო გაძლიერდა“ , - აღნიშნა კაპანაძემ.