„ირაკლი ღარიბაშვილი არის ჩემი მეგობარი, წლების განმავლობაში ვმეგობრობთ ჩვენ და მე მხოლოდ მივესალმებოდი მის შინაგან საქმეთა მინისტრობას“, განაცხადა პარტია „ქართული ოცნების“ გენერალურმა მდივანმა, თბილისის მერმა კახა კალაძემ მედიაში გავრცელებული ინფორმაციის საპასუხოდ, თითქოს, იგი ირაკლი ღარიბაშვილის შინაგან საქმეთა მინისტრად დანიშვნის წინააღმდეგია.

კახა კალაძის თქმით, საბოლოო გადაწყვეტილება პრემიერ მინისტრობის კანდიდატმა უნდა მიიღოს, ხოლო გუშინდელ შეხვედრაზე მინისტრობის კანდიდატებზე საუბარი საერთოდ არ ყოფილა.

„გავრცელებული ინფორმაცია არის ძალიან დიდი ტყუილი და სიცრუე. არ ვიცი, ვინ მოიგონა და საიდან მოიტანეს ეს აბსურდი და სისულელე მე ასე დავარქმევდი ამას. პირველი, რაც მინდა ვთქვა - ირაკლი არის ჩემი მეგობარი, წლების განმავლობაში ჩვენ ვმეგობრობთ. მეორე, რაც მთავარი და მნიშვნელოვანია - გუშინ საერთოდ არ ყოფილა საუბარი, თუ ვინ იქნებოდნენ მინისტრობის კანდიდატები, საერთოდ განხილულიც კი არ ყოფილა და ამიტომ მიკვირს, საიდან მოიტანეს ამხელა სისულელე. მესამე, ასევე, რაც მთავარი და მნიშვნელოვანი არის - ვინ იქნება მინისტრთა კაბინეტში, ამას უშუალოდ პრემიერ მინისტრი წარმოადგენს და პრემიერ მინისტრი მიიღებს გადაწყვეტილებას, თუ ვინ იქნება მის გუნდში და ვინ იმუშავებს. მე თუ მეკითხებით, როგორც გენერალურ მდივანს, რა თქმა უნდა, მივესალმებოდი ირაკლი ღარიბაშვილის შინაგან საქმეთა მინისტრობას, მგონია, რომ ის იქნება ძალიან ძლიერი შინაგან საქმეთა მინისტრი, დანარჩენი გადასაწყვეტია იმის მიერ, ვინც იქნება პრემიერ მინისტრობის კანდიდატი“, განაცხადა კახა კალაძემ.