იმერეთის გუბერნატორი გივი ჭიჭინაძე, გუბერნატორის პირველი მოადგილე პაატა ნადირაძე, ვიცე-გუბერნატორი იოსებ ხახალეიშვილი, თერჯოლის მუნიციპალიტეტის გამგებელი თეიმურაზ ჯაფარიძე და ადგილობრივი ხელისუფლების სხვა  წარმომადგენლები მონიტორინგის ფარგლებში თერჯოლაში მიმდინარე პროექტების განხორცილებას გაეცვნენ.


იმერეთის სამხარეო ადმინისტრაციის ინფორმაციით, მუნიციპალიტეტში საგზაო ინფრასტრუქტურის მშენებლობის პროცესი აქტიურად მიმდინარეობს. 16 პროექტი უკვე დასრულებულია, ხოლო 7 მათგანზე სამუშაოები ხორციელდება.


ამ ეტაპზე სოფლების ჩხარი-ზედა ალისუბნის დამაკავშირებელი 4 კმ–იანი გზის მონაკვეთის მოასფალტება ხდება, ასევე ბარდუბანი-ზედა სიმონეთისა და თერჯოლა-ტელეფის დამაკავშირებელი გზების რეაბილიტაცია მიმდინარეობს. სამუშაოებზე 30–ზე მეტი ადგილობრივია დასაქმებული და პროექტები რეგიონული განვითარების ფონდიდან 1 700 000 ლარით არის დაფინანსებული. სოფლებში ამ დრომდე გზა სრულიად ამორტიზებული იყო, რაც მოსახლეობისა და ტრანსპორტის გადაადგილებას საფრთხეს უქმნიდა.


თერჯოლაში მიმდინარე წელს ასევე, მნიშვნელოვნად გაუმჯობესდა საბავშვო ბაღების ინფრასტრუქტურა. პრიორიტეტულად გამოცხადებულ მიმართულებაზე მილიონ ლარზე მეტი დაიხარჯა. მუნიციპალიტეტში სულ 11 სკოლამდელი აღზრდის დაწესებულება აღდგა, ხოლო სოფელ გოდოგანში თანამედროვე სტანდარტების შესაბამისი ბაღი აშენდა.


სამხარეო ადმნისტრაციის ცნობითვე, ამ ეტაპზე თერჯოლის მუნიციპალიტეტის ოთხ ისეთ სოფელში მიმდინარეობს მშენებლობის პროცესი, სადაც ამ დრომდე სკოლამდელი აღზრდის დაწესებულება საერთოდ არ არსებობდა. საბავშვო ბაღები 30–40 აღსაზრდელზეა გათვლილი. სამშენებლო სამუშაოები კი ოქტომბერში დასრულდება.