„მთავარმა არხმა“ მიიღო ლიცენზია, რომელიც მას საშუალებას აძლევს ეთერში გაუშვას საინფორმაციო გამოშვება და პოლიტიკური თოქ შოუები. ინფორმაციას კომუნიკაციების ეროვნული მარეგულირებელი კომისია ავრცელებს.

„5 სექტემბერს კომუნიკაციების კომისიამ შპს „მთავარ არხს“ სპეციალიზებული გასართობი მაუწყებლობის ნაცვლად საერთო მაუწყებლის ავტორიზაცია მიანიჭა. კომუნიკაციების კომისიას „მთავარმა არხმა“ მაუწყებლობის ავტორიზაციის მოდიფიცირების თხოვნით 26 აგვისტოს მიმართა. კომისიამ შეისწავლა კომპანიის მიერ წარმოდგენილი დოკუმენტაცია, რომელიც კანონის მოთხოვნებს სრულად აკმაყოფილებს და არხი უწყებრივ რეესტრში კერძო საერთო მაუწყებლად გაატარა.

არხი მაუწყებლობას საქართველოს მთელ ტერიტორიაზე 9 სექტემბრიდან დაიწყებს. შპს „მთავარი არხი“ ვალდებულია დაიცვას მაუწყებლობის შესახებ კანონი, მათ შორის კომისიის დადგენილებები, გადაწყვეტილებები და ავტორიზაციის ყველა პირობა“, აღნიშნულია კომისიის განცხადებაში.

ამ დრომდე „მთავარ არხს“ მხოლოდ გასართობი გადაცემების მაუწყებლობის უფლება ჰქონდა.

საინფორმაციო გადაცემა „მთავარი“ პირველად 9 სექტემბერს, საღამოს 9 საათზე გავა.