ტყუილების კორიანტელი, რომლისთვისაც „ნაცმოძრაობამ“ გამოიყენა მაკო გომურიც, არის იმის განსახიერება, როგორ აცხოვრებდნენ ისინი ჩვენს საზოგადოებას წლების განმავლობაში, – განაცხადა პრემიერ მინისტრობის კანდიდატმა, გიორგი გახარიამ პარტია „ნაციონალური მოძრაობის“ ფრაქციის წევრებთან საპარლამენტო გამოსვლის დასრულების შემდეგ.

„რამდენიმე სიტყვით მივმართავ ჩვენს მოქალაქეებს, პირველ რიგში, ამომრჩევლებს. ეს სპექტაკლი, რაც ახლა აქ მოაწყვეს, კიდევ ერთი დადასტურებაა იმ ფუნდამენტური პრობლემის, რაზეც „ნაციონალური მოძრაობა" დგას - ეს არის სიცრუე. ყველას კარგად გვესმოდა და ველოდით, რომ დღეს აქ მსგავსი სპექტაკლი იქნებოდა, თუმცა ჩვენ პატივს ვცემთ მათ ამომრჩევლებს და ინსტიტუტებს. ამიტომ მოვედით აქ და ჩვენი ამოცანაა, პირველ რიგში, მათ ამომრჩევლებთან საუბარი. ის ტყუილების კორიანტელი, რომლისთვისაც მათ გამოიყენეს მაკო გომურიც, რომლითაც მათ უბრალოდ მოიტყუეს, რომ ეს ადამიანი არის აქ, ეს არის იმის განსახიერება, როგორ სიცრუეში აცხოვრებდნენ ისინი ჩვენს საზოგადოებას წლების განმავლობაში ", - განაცხადა გახარიამ.