კახეთის რეგიონში გუშინ ღამით მოსული ძლიერი წვიმის შედეგად ფშაველი–აბანო–ომალოს საავტომობილო გზის რამდენიმე მონაკვეთი დაზიანდა, რის გამოც ავტოსატრანსპორტო მოძრაობა ამ მიმართულებით დროებით შეჩერებულია.


საქართველოს რეგიონული განვითარებისა და ინფრასტრუქტურის სამინისტროს საავტომობილო გზების დეპარტამენტის მიერ გზის გაწმენდითი სამუშაოები მიმდინარეობს. ადგილზე მობილიზებულია კონტრაქტორი კომპანია „თუშეთავტოგზის“ სპეციალური ტექნიკა.


სტიქიის გამო, შეფერხებული იყო მოძრაობა ლაგოდეხი–ყვარლის მთავარ ავტომაგისტრალზეც. ამ დროისათვის გზის ეს მოანკვეთი გაწმენდილია და გადაადგილება შეუზღუდავია.


თუშეთთან დამაკავშირებელი ფშაველი-ომალოს გზის მონაკვეთზე განვითარებული სტიქიური მოვლენების გამო „თუშეთობა 2015“ 22 -23 აგვისტოს აღარ ჩატარდება, ამის შესახებ გარემოსა და ბუნებრივი რესურსების დაცვის სამინისტროს მიერ გავრცელებულ განცხადებაშია აღნიშნული.