„ნაციონალურმა მოძრაობამ“ ბოიკოტის რეჟიმი შეწყვიტა და პარლამენტში მთავრობის დამტკიცების შესახებ მიმდინარე სხდომაზე დასწრების გადაწყვეტილება მიიღო.

როგორც ფრაქცია „ნაციონალური მოძრაობის“ თავმჯდომარემ რომან გოცირიძემ „ტვ პირველის“ პირდაპირ ეთერში ჩართვისას თქვა, „ამ ხელისუფლების სურვილი არის მოამზადონ პოლიციური რეჟიმი არჩევნებისათვის“.

„ეს არის ფაქტობრივად, „ქართული ოცნების“ საარჩევნო შტაბი, დაკომპლექტებული ძალოვანი მინისტრების მიერ. ყველა ძალოვანი მინისტრი, რომელიც აქ არის, არის ივანიშვილის ერთ დროს პირადი მოსამსახურე. ამ ადამიანებს ივანიშვილი უხდიდა თავად ფულს, ზოგს, როგორც ადვოკატს, ზოგს როგორც ბანკირს, ზოგს როგორც დარაჯს, ზოგს როგორც ექიმს. ყველა მინისტრი, ამა თუ იმ ფორმით ღებულობდა ივანიშვილისაგან ფულს. ისინი იყვნენ ივანიშვილის პირადი დაქირავებული ადამიანები, ძალიან სამარცხვინო მოვლენაა და არც ერთ ქვეყანაში ალბათ ისტორიაში არ მომხდარა ფაქტი, რომ მმართველი ხელისუფლება სრულად, მათ შორის პარლამენტს, ადგილობრივ ხელისუფლებას აკომპლექტებდეს იმის მიხედვით, რომელიც მისი ხელქვეითები იყვნენ ამა თუ იმ დროს. ეს არ არის საქართველოს ხელისუფლება. ეს არის „ქართუ ბანკისა“ და „ქართუ ჰოლდინგის“ ხელისუფლება, რომელიც პირადად ივანიშვილის ინტერესებს ემსახურებოდა ბიზნესში და ახლა ემსახურება როგორც სახელმწიფოს მართვის რგოლების ხელმძღვანელები. აი, ამ სავალალო მდგომარეობაში იმყოფება ქვეყანა და ეს მთავრობა მტკიცდება ხელმეორედ, იგივე სახეებით, იგივე წარუმატებელი სახეებით, ვინც ჩვენ ვიხილეთ და ჩვენმა ხალხლამ გამოსცადა საკუთარი ჯიბით და საკუთარი ცხოვრებით“, განაცხადა რომან გოცირიძემ.

ამ წუთებში დეპუტატების წინაშე თავისი პროგრამით პრემიერ მინისტრობის კანდიდატი გიორგი გახარია გამოდის.