„ივანიშვილის ხელისუფლებას კეფაში ესმის ქართველი ხალხის სუნთქვა და რა თქმა უნდა, ძალიან მალე ქართველი ხალხი დაიბრუნებს თავის ქვეყანას და გადადგამს ივანიშვილის ხელისუფლებას იქ, სადაც უნდა გადაიდგას“, - განაცხადა „ერთიანი ნაციონალური მოძრაობის“ პოლიტიკური საბჭოს თავმჯდომარემ, ნიკა მელიამ პარლამენტში მისვლის შემდეგ, ჟურნალისტებთან საუბრისას.

„მე სიტყვით გამოვალ პარლამენტში. ეს არის პირველი სხდომა მას შემდეგ, რაც მე სამაჯურით შემამკეს. იმის შემდეგ არ ჩატარებულა სხდომა, თუ არ ჩავთვლით მიმდინარე კვირას და მე ვაპირებდი მოსვლას და გადავწყვიტე დღეს მოვიდე სწორედ. დღეს საქართველოს მოქალაქე ვერც ერთი უფლებით ვერ სარგებლობს, ვერც პოლიტიკურით, ვერც სოციალურით, ვერც ეკონომიკურით. ივანიშვილის ხელისუფლებას კეფაში ესმის ქართველი ხალხის სუნთქვა და რა თქმა უნდა, ძალიან მალე ქართველი ხალხი დაიბრუნებს თავის ქვეყანას და გადადგამს ივანიშვილის ხელისუფლებას იქ, სადაც უნდა გადაიდგას, მათ შორის იქიდანაც, საიდანაც მართავს ის ქვეყანას არაკონსტიტუციურად, გადადგამს იქიდან, საიდანაც ჩასვეს მათ გავრილოვი.

„არაფერი იმაზე ძლიერი არ შექმნილა ამ სამყაროში, როგორც მართალი ადამიანი და როდესაც ადამიანი არის მართალი, იგი მთასაც გადადგამს და რომელი მთა ივანიშვილია, ხომ?! აქედან გამომდინარე, გარდაუვალია გამარჯვება. უბრალოდ დარჩა მოკლე დისტანცია დასაფარი. არის ფინიშის სწორი, ემოციები მძვინვარებს, გასაგებია, მაგრამ ჩვენი პასუხიმგებლობის მქონე ოპოზიციური ძალების ამოცანაა რომ ყველაფერი გავაკეთოთ იმისათვის, რომ ივანიშვილის ხელისუფლების მარცხის და ჩამოშორებისთანავე, დაიწყოს ქვეყნის აღმშენებლობა“, განაცხადა მელიამ.