აჭარის „ნაციონალური მოძრაობისაგან“ გაწმენდის შესახებ ავტონომიური რესპუბლიკის ხელმძღვანელის, თორნიკე რიჟვაძის მიერ გაკეთებულ განცხადებას პოლიტიკური მოძრაობა „ემსახურე საქართველოს“ ლიდერმა, მურმან დუმბაძემ „აჭარის საზოგადოებრივ მაუწყებელში“ პირდაპირი ჩართვისას უპასუხა და თქვა, რომ რიჟვაძემ ეს პროცესი მამით უნდა დაიწყოს.

„მამით უნდა დაიწყოს მაშინ, ასე ვთქვათ, „ნაციონალური მოძრაობის“ დასამარება აჭარაში იმიტომ, რომ როცა 2011 წლის 21 მაისს „აჭარის ტელევიზიასთან“ მოვედით მომიტინგეები „ერას მოედნიდან“, მაშინ მისი მამა იყო იყო ყველაზე, ასე ვთქვათ, აგრესიული მარბიელი და ამ ადამიანმა მოახერხა ის, რომ 7 ადამიანი დააპატიმრებინა მაშინდელ სამართალდამცავ ორგანოებს და ჩააბარა პროკურატურას და შემდეგ ცრუ ჩვენებები მისცა. ეს იყო თორნიკე რიჟვაძის მამა“, განაცხადა მურმან დუმბაძემ.