თაკო ჩარკვიანმა ცილისმწამებლური და ბინძური ტალახის სროლა დაიწყო „ევროპული საქართველოს“ მისამართით, – განაცხადა „ევროპული საქართველოს“ წევრმა, დეპუტატმა სერგი კაპანაძემ პარტია „კანონი და სამართლის“ ლიდერის, თაკო ჩარკვიანის განცხადებასთან დაკავშირებით, სადაც ჩარკვიანმა ოპოზიციური პარტიებისადმი „ევროპული საქართველოს“ შეთავაზება შეაფასა.

დეპუტატის განცხადებით, არასწორია ოპოზიციურ პარტიებს შორის ურთერთობები ტალახის სროლის კამპანიის პირობებში არსებობდეს, რაც, კაპანაძეს თქმით, ჩარკვიანის მხრიდან ბოლო პერიოდში რამდენჯერმე უკვე დაფიქსირდა.

„თაკო ჩარკვიანმა საკმაოდ ნეგატიური შეფასება გააკეთა, არა შინაარსის მიმართ, თუმცა ცილისმწამებლური და ბინძური ტალახის სროლა დაიწყო „ევროპული საქართველოს“ მისამართით. არ მიგვაჩნია სწორად, რომ ჩვენ შორის ურთიერთობები იყოს ცილისწამების, ტალახის სროლის კამპანიის პირობებში, რაც არაერთხელ მოხდა ბოლო პერიოდში, განსაკუთრებით ჩარკვიანის მხრიდან. ჩვენი მოწოდება იქნება, „ძალა ერთობაშიას“ მიმართ, გააკეთონ შეფასება ამ განცხადებაზე. ისინი აპირებენ, რომ ამ სტილში, „ასავალ-დასავალისა“ და სიბინძურის სტილში გააგრძელებენ ურთიერთობას თუ ემიჯნებიან და ამ განცხადებას“, – განაცხადა სერგი კაპანაძემ.

„მკაფიოდ განვაცხადოთ, რომ ივანიშვილის მთავრობასთან არ შევალთ კოალიციაში“, – განაცხადა „ევროპული საქართველოს“ ერთ-ერთმა ლიდერმა გიგი უგულავამ.

თაკო ჩარკვიანი ამ მოწოდებას გამოეხმაურა და განაცხადა, რომ „ევროპული საქართველოს“ ინიციატივას თაღლითობის სუნი ასდის.