მოძრაობა „სახელმწიფო ხალხისთვის“ დამფუძნებელი, 2018 წლის საპრეზიდენტო არჩევნებზე „ერთიანი ნაციონალური მოძრაობის“ კანდიდატის, გრიგოლ ვაშაძის მგზნებარე მხარდამჭერი პაატა ბურჭულაძე აცხადებს, რომ საქართველოს პრეზიდენტად „უცხო ქვეყნიდან ჩამობრძანებული არაადეკვატური ქალი დაგვინიშნეს“, რომელიც „საერთოდ ვერ ხვდება სად ცხოვრობს და რა არის ხალხის გულისტკივილი“.

„ყველა მწვავე პრობლემა, რაზეც დღეს ხმამაღლა საუბრობენ, ჩემთვის უკვე ცხადი იყო 2016-ში. საქართველოს მოსახლეობის უკიდურესი სიღარიბე, ივანიშვილის მიერ ქვეყნის ერთი კაცის კომპანიად ქცევა, საგარეო კურსი - იყო ის მთავარი საკითხები, რის გამოც ჩამოვაყალიბე მოძრაობა „სახელმწიფო ხალხისთვის“. მთავარი ის არის, რომ მაშინ ხალხს არ ჰქონდა ბოლომდე გაცნობიერებული ქვეყნის დეგრადაციის პროცესი. სამწუხაროდ, არც საპრეზიდენტო არჩევნების დროს, როცა ქუჩაში გაკრული 8 წლის წინანდელი ხელისუფლების საფრთხობელა-ბანერებით გვაშინებდნენ და უცხო ქვეყნიდან ჩამობრძანებული არაადეკვატური ქალი დაგვინიშნეს. ის საერთოდ ვერ ხვდება სად ცხოვრობს და რა არის ხალხის გულისტკივილი.

რატომ ვიგვიანებთ მუდმივად? რატომ ველოდებით სანამ ბოლომდე არ გაფუჭდება საქმე? მაინცდამაინც სახელმწიფოებრიობა უნდა დავკარგოთ, რომ მივხვდეთ ვის ხელში ვართ ჩავარდნილი?“ - აცხადებს ბურჭულაძე.