დანიის სამეფოს დედაქალაქ კოპენჰაგენში, ევროპის გარემოს დაცვის სააგენტომ (EEA) „ერთიანი გარემოსდაცვითი საინფორმაციო სისტემების პრინციპებისა და პრაქტიკის განხორციელება აღმოსავლეთ პარტნიორობის ქვეყნებში“ (ENI SEIS East II) პროექტის ფარგლებში, ექვსი ქვეყნის (საქართველო, აზერბაიჯანი, სომხეთი, ბელარუსი, მოლდოვა, უკრაინა) წარმომადგენლებისთვის  მორიგი ორდღიანი სემინარი „გარემოსდაცვითი ინფორმაციის ეფექტიანად გავრცელების შესახებ“ ჩატარდა.

სემინარის მიზანს, გარემოსდაცვითი ინფორმაციის გაზიარებისა და გავრცელების გაუმჯობესებისთვის, კომუნიკაციის მიმართულებით სხვადასხვა მეთოდისა და ტექნიკის გამოყენების გაცნობა წარმოადგენდა. სემინარი ასევე მოიცავდა სოციალური მედიის და კრიზისული სიტუაციების ეფექტიანი მართვის საკითხებს.

სემინარში  საქართველოდან გარემოს დაცვისა და სოფლის მეურნეობის სამინისტროს სტრატეგიული კომუნიკაციის დეპარტამენტის წარმომადგენელი, სსიპ გარემოსდაცვითი ინფორმაციისა და განათლების ცენტრის (EIEC) ინფორმაციული სისტემების ექსპერტი და ENI SEIS II პროექტის ეროვნული ასისტენტი მონაწილეობდნენ.  

აღსანიშნავია, რომ (ENI SEIS East II)  პროექტი დაფინანსებულია ევროკავშირის ევროპული სამეზობლო ინსტრუმენტის (ENI) მიერ და ხელს უწყობს საზოგადოებისთვის გარემოსდაცვითი ინფორმაციის გაზიარებას. პროექტის მიზანია გარემოსდაცვითი მმართველობის გაძლიერების მეშვეობით ევროკავშირსა და აღმოსავლეთ პარტნიორობის ქვეყნებს შორის ურთიერთობების გაღრმავება და გარემოს დაცვის მხარდაჭერა.