საქართველოს მთავრობაში სავარაუდოდ, საკადრო ცვლილებები იგეგმება. ტელეკომპანია „იმედის“ ინფორმაციით, ცვლილება საგარეო საქმეთა მოქმედ მინისტრს თამარ ბერუჩაშვილს უკავშირდება, რომლის ადგილსაც სავარაუდოდ, ეკონომიკისა და მდგრადი განვითარების მოქმედი მინისტრი გიორგი კვირიკაშვილი დაიკავებს.


რაც შეეხება გიორგი კვირიკაშვილის შემცვლელს, ტელეკომპანიის ცნობით, საუბარია ბიზნეს ომბუდსმენ გიორგი გახარიაზე.


გავრცელებული ინფორმაციით, მთავრობის ადმინისტრაციაში საკადრო გადაადგილებები სექტემბრისთვის იგეგმება.


ორივე მინისტრი აღნიშნულ ინფორმაციის დადასტურებისგან თავს იკავებს. „ამ გადაწყვეტილებებს ღებულობს მთავრობის თავმჯდომარე. მე მგონი სჯობს, რომ მას მიმართოთ. არ არის სწორი ეს შეკითხვა“, – განაცხადა გიორგი კვირიკაშვილმა.


რაც შეეხება თამარ ბერუჩაშვილს, როგორც ის აღნიშნავს, მისთვის აღნიშნული ინფორმაცია ცნობილი არ არის და ამის შესახებ თავადაც პრესიდან შეიტყო.


„ჩემთვის ეს ინფორმაცია ცნობილი არ არის, ამიტომ ვერაფერს ვერ დაგიდასტურებთ და ამაზე კომენტარს ვერ გავაკეთებ ნამდვილად. როგორც ყველა სხვამ, მეც გავიგე პრესიდან“, – აღნიშნა ბერუჩაშვილმა.