რეგიონული განვითარებისა და ინფრასტრუქტურის მინისტრმა ნოდარ ჯავახიშვილმა მთავრობის სხდომის დასრულების შემდეგ ჟურნალისტებთან ნეპოტიზმთან დაკავშირებით ისაუბრა და განაცხადა, რომ ნეპოტიზმი ყველაში ზის და აქედან გამომდინარე, მასთან ბრძოლა ადვილი არ არის.


"შევარდნაძის პერიოდში მინიმუმ თვეში ორჯერ ვიკრიბებოდით სხვადასხვა თანამდებობის პირები და ვქმნიდით კორუფციის წინააღმდეგ ბრძოლის კომისიებს. შაბათი დღე იყო, მახსოვს, ავდექი მთავრობის სხდომაზე, დავიღალე უბრალოდ და ვუთხარი ყველას, რომ რაზე მსჯელობთ ვერ გამიგია-მეთქი. მთელი ხელისუფლება აქ ვსხედვართ. კორუფცია არის ხელისუფლების მონაწილეობით ჩადენილი დანაშაული და ახლა ჩვენ უნდა შევქმნათ კომისია, რომელიც ჩვენ დაგვაჭრის კუდებს-მეთქი. ორშაბათს დილას უნდა ავდგეთ, ჩავირტყათ ხელებზე, მოდი აღარ ავიღებთ ქრთამსო და დამთავრდა კორუფცია ამით? ნეპოტიზმზე რა უნდა ვაკეთოთ, ჩაიხედოს ყველამ თავის გულში. დავანებოთ თავი ხელისუფლების წარმომადგენლებს. დავიღალე რიგითი ადამიანებისგან, ჩემი მეგობრებისგან, ახლობლებისგან, რომლებიც ნახევარი საათი მელაპარაკებიან რა საშიში უბედურებაა ეს ნეპოტიზმი და ბოლო წინადადებად მეუბნებიან, იქნებ ჩემი შვილი მიიღო სამსახურშიო. ეს ნეპოტიზმი ჩვენში ზის, ყველაში და თანამდებობის პირმა რამდენს უნდა გაუძლოს? არ ვიხსნი პასუხისმგებლობას. დიახ, უნდა გაუძლოს, რადგან თანამდებობის პირია, მაგრამ თუ ეს ნეპოტიზმი არ გინდათ კაცო, ნურავის ნუ თხოვთ მიმიღეთ სამსახურშიო", - განაცხადა ნოდარ ჯავახიშვილმა.